பிகார்: அரசு தேர்வை ரத்து செய்யக் கோரி பிரசாந்த் கிஷோர் காலவரையற்ற உண்ணாவிரதம்

பிகாரில் வினாத்தாள் கசிந்ததாக குற்றஞ்சாட்டப்படும் அரசுப் பணியாளர் தேர்வை ரத்து செய்யக் கோரி ஜன சுராஜ் கட்சித் தலைவரும் முன்னாள் தேர்தல் வியூக வகுப்பாளருமான பிரசாந்த் கிஷோர் காலவரையற்ற உண்ணாவிரதப் போராட்டத்தை வியாழக்கிழமை தொடங்கினார்.

பிகாரில் அரசுப் பணியிடங்களை நிரப்புவதற்கான போட்டித் தேர்வு கடந்த டிசம்பர் 13-ஆம் தேதி நடத்தப்பட்டது. 5 லட்சத்துக்கும் மேற்பட்டோர் பங்கேற்ற இத்தேர்வின் வினாத்தாள் முன்கூட்டியே கசிந்ததாக குற்றச்சாட்டு எழுந்த நிலையில், அனைத்து தேர்வு மையங்களிலும் மறுதேர்வு நடத்தக் கோரி தேர்வர்கள் கடந்த சில நாள்களாக போராட்டத்தில் ஈடுபட்டுள்ளனர்.