சிந்துவெளி நாகரிகமும் தமிழ்நாட்டின் இரும்புக் காலமும் சமகாலத்தவை

சிந்துவெளி நாகரிகமும் தமிழ்நாட்டின் இரும்புக்காலமும் சமகாலத்தவையாக இருப்பதை தொல்லியல் அகழாய்வின் அறிவியல் கணக்கீடுகள் உறுதி செய்வதாக முதல்வர் மு.க.ஸ்டாலின் கூறினார்.

சிந்துவெளி கண்டுபிடிப்பின் பண்பாட்டுக் நூற்றாண்டு நிறைவு தொடர்பான சர்வதேச கருத்தரங்கம் சென்னையில் ஞாயிற்றுக்கிழமை தொடங்கியது.

மூன்று நாட்கள் நடைபெறும் இந்தக் கருத்தரங்கை தொடங்கி வைத்து முதல்வர் மு.க.ஸ்டாலின் பேசியதாவது: திமுக அரசு அமைந்ததும், அந்த அரசுக்கு 'திராவிட மாடல் அரசு' எனப் பெயர் சூட்டினோம். ஒரு கட்சியின் அரசு என்று குறிப்பிடாமல், ஓர் இனத்தின் அரசு எனக் குறிப்பிட்டேன். இதற்கு அடையாளமாக இந்த விழா நடைபெறுகிறது.

இன வரலாற்றை ஆய்வுக் கண் நோட்டத்துடன் பார்க்கும் முதிர்ச்சியுடன், அறிவுச் செயற்பாடாக இந்தக் கருத்தரங்கம் நடைபெறுகிறது. இந்தியாவின் எந்த மாநிலத்திலும் இப்படி ஒரு விழாவை அரசே முன்னின்று நடத்தியதில்லை. மாபெரும் பண்பாட்டு பெருவிழாவாக ஏற்பாடு செய்யப்பட்டுள்ளது.

இந்திய துணைக் கண்ட வரலாற்றில் நமக்கான இடத்தை நிலைநிறுத்துவதே நம்முடைய நோக்கம்.

சர் ஜான் மார்ஷல்:
சிந்துவெளி நாகரிகம் முதல்முதலில் 20.9.1924-இல் உலகுக்கு அறிவிக்கப்பட்டது. இந்திய தொல்லியல் துறை இயக்குநர் ஜெனரலாக இருந்த சர் ஜான் மார்ஷல் அதை அறிவித்தார். ஆரியமும் சம்ஸ்கிருதமும்தான் இந்தியாவின் மூலம் என்ற கற்பனையை வரலாறாகச் சொல்லி வந்தனர்.