వికసిత్ భారత్ లక్ష్యంగా ముందుకు సాగుతాం

గత పదేళ్ల అనుభవం.. సభ్యుల సహకారంతో ప్రజలకు సేవ 140కోట్ల ప్రజల ఆకాంక్షలు గుర్తెరిగి పనిచేస్తా రాజ్యాంగానికి అనుగుణంగా పాలన సాగిస్తా విపక్షాలు కూడా ప్రజల పక్షాన బలంగా నిలబడాలి. పార్లమెంట్ సమావేశాల సందర్భంగా ప్రధాని మోడీ వ్యాఖ్యలు

న్యూఢిల్లీ, స్నేహిత ఎక్స్ ప్రెస్: వికసిత్ భారత్ సంకల్పం, కొత్త లక్ష్యాన్ని నిర్దేశించుకొని ముందుకు సాగుతామని ప్రధాని నరేంద్ర మోడీ తెలిపారు. తమ పదేళ్ల పాలనానుభవం, కొత్త సభ్యుల ఆకాంక్షలు, దేశ ప్రజల ఆశల మేరకు ముందుకు సాగుతామని అన్నారు. మరింత కఠిన శ్రమతో దేశానికి సేవచేస్తానని మోడీ ప్రకటించారు. కొత్త పార్లమెంటు భవనంలో లోక్సభ సమావేశాలు సోమవారం ప్రారంభం అయిన సందర్భం గా మోడీ మీడియాతో మాట్లాడారు. లోక్ సభ సభ్యులకు ప్రధాని మోడీ స్వాగతం పలికారు. ఇది చాలా పవిత్రమైన రోజు అని పేర్కొన్నారు. 140 కోట్ల ప్రజల ఆకాంక్షలు నెరవేరిస్తామని, సామాన్య ప్రజల కలలు సాకారం చేస్తామని, ప్రజల జీవన ప్రమాణాలు పెంచేందుకు కృషి చేస్తామన్నారు.