234 தொகுதிகளுக்கும் சுற்றுப்பயணம் செய்வேன்!

அ.தி.மு.க. மாவட்டச் செயலாளர்கள் கூட்டத்தில் எடப்பாடி பேச்சு!

அ.தி.மு.க. மாவட்டச் செயலாளர்கள் கூட்டம் இன்று நடந்தது. அவர்கள் மத்தியில் எடப்பாடி பழனிசாமி உரையாற்றினார். அதில் 2026 தேர்தலில் கூட்டணி மாற்றம் நிச்சயம் நிகழும் என்றும், 234 தொகுதிகளுக்கும் சுற்றுப் பயணம் செய்வேன் என்றும் கூறியிருக்கிறார். அதுடன் தி.மு.க., பா.ஜ.க.வைத் தவிர மற்ற கட்சிகளை விமர்சிக்க வேண்டாம் என்றும் கூறியதாக தெரிவிக்கப்படுகிறது.

தமிழக அரசியலில் சமீப காலமாக பரபரப்பான சூழ்நிலை ஏற்பட்டுவருகின்றது. அக்டோபர் 2-ஆம் தேதி வி.சி.க. சார்பில் மது ஒழிப்பு மாநாடு நடந்தது. இதில் அ.தி.மு.க.வும் பங்கேற்கலாம் என திருமாவளவன் கூறியதையடுத்து அரசியலில் பரபரப்பு தொற்றியது.

பின்னர் ஆட்சி அதிகாரத்தில் பங்கு வேண்டும் என வி.சி.க. தலைவர்கள் பேசத் தொடங்கினார்கள். இதுவும் அந்த பரபரப்பை மேலும் அதிகரிக்க வைத்தது.

இந்த நிலையில் நடிகர் விஜய் அவரது கட்சியின் முதலாவது மாநாட்டை நடத்தினார். அப்போது தனது முதல் அரசியல் எதிரி தி.மு.க. என்பது அடையாளம் காட்டினார்.

2026 சட்டசபைத் தேர்தலில் கூட்டணி அமைக்க வரும் கட்சிகளுக்கும் ஆட்சி அதிகாரத்தில் பங்கு வழங்கப்படும் என குறிப்பிட்டார். அவரது இந்த கருத்தால் தி.மு.க. அணியிலுள்ள கட்சிகள் விஜய் சாயலாம் என அரசியல் அரங்கில் விவாதங்கள் எழுந்தன.