காற்றழுத்த தாழ்வு நிலையால் வட கடலோர மாவட்டங்களில் மழை நீடிப்பு

குறைந்த காற்றழுத்த தாழ்வு நிலை காரணமாக தமிழக கடலோர மாவட்டங்களில் மழை தொடர்ந்து பெய்து வருகிறது.

குறிப்பாக வடகடலோர மாவட்டங்களில் கனமழை பெய்கிறது. சீர் காழியில் 14 செ.மீ. அளவுக்கு கொட்டித்தீர்த்துள்ளது.

தமிழ்நாட்டில் வடகிழக்கு பருவ மழை அக்டோபர் 16-ஆம் தேதி தொடங்கியது. ஆனால் மாநிலம் முழுவதும் எதிர்பார்த்த அளவுக்கு முழு அளவில் மழை பெய்யவில்லை.

வடகிழக்கு பருவ மழை முறைப்படி தொடங்குவதற்கு ஒருநாளுக்கு முன்னர் தான் சென்னை மற்றும் அதன் சுற்றுவட்டார மாவட்டங்களில் கனமழை பெய்தது.

அதன் பிறகு கோவை, திருப்பூர் உள்ளிட்ட ஒரு சில மேற்குமாவட்டங்களிலும், மேற்குதொடர்ச்சி மலைக்கு அருகிலுள்ள பகுதிகளில் தான் அவ்வப்போது மழை பெய்தது. மதுரை மாவட்டத்தில் கூட ஒரு நாள் கனமழை பெய்தது.