5 ജീവൻ ഉരുളെടുത്തു

5 ദിവസം കൂടി പെരുമഴ

ഓണം ഒരാഴ്ചയകലെ നിൽക്കുമ്പോഴും മഴദുരിതം പെയ്തൊഴിയാതെ കേരളം. ഇടുക്കി ജില്ലയിലെ തൊടുപുഴ, കുടയത്തുരിൽ ഇന്നലെ പുലർച്ചെയുണ്ടായ ഉരുൾ പൊട്ടലിൽ അഞ്ചുവയസുകാരനുൾപ്പെടെ ഒരു കുടുംബത്തിലെ അഞ്ചുപേർക്കു ദാരുണാന്ത്യം. അപ്രതീക്ഷിതമഴയിലും മിന്നൽ പ്രളയത്തിലും കോട്ടയം, പത്തനംതിട്ട ജില്ലകളിൽ വ്യാപകനാശനഷ്ടം. സംസ്ഥാനത്ത് അടുത്ത അഞ്ചുദിവസം കൂടി വ്യാപകമഴയ്ക്കു സാധ്യതയെന്നു കേന്ദ്ര കാലാവസ്ഥാവകുപ്പിന്റെ മുന്നറിയിപ്പ്.

തൊടുപുഴ, കുടയത്തൂർ സംഗമം കവലയ്ക്കു സമീപമുണ്ടായ ഉരുൾപൊട്ടലിൽ വീടിനു മുകളിലേക്കു പാറയും മണ്ണും മരങ്ങളും പതിച്ച് പന്തപ്ലാവ് ചിറ്റടിച്ചാലിൽ തങ്കമ്മ (70), മകൻ സോമൻ (53), ഭാര്യ ഷിജി (50), മകൾ ഷിമ (25), ഷിമയുടെ മകൻ ദേവാക്ഷിദ് (അഞ്ച്) എന്നിവരാണു മരിച്ചത്. ഏഴുമണിക്കൂറോളം നീണ്ട രക്ഷാപ്രവർത്തനത്തിനൊടുവിലാണു മണ്ണിനടിയിൽ നിന്നു മൃതദേഹങ്ങൾ പുറത്തെടുത്തത്. ഇന്നലെ പുലർച്ചെ മൂന്നോടെയായിരുന്നു ദുരന്തം.