શાબાશ AMC! ભરચોમાસે પણ સ્ટ્રીટલાઇટ બંધ પડવા દીધી નહીં

૪થી ૯ જુલાઈ દરમિયાન ૮૦૮ સ્ટ્રીટલાઇટ અને ૧૧થી ૧૬ જુલાઈમાં ૧૦૫૧ સ્ટ્રીટલાઇટ બંધ હતી: ૧૫ દિવસમાં ૯૯ ટકા સ્ટ્રીટલાઇટ ઝળહળતી રહી

અમદાવાદ, બુધવાર

સામાન્ય રીતે વરસાદની ઋતુમાં અનેક પ્રકારની સમસ્યાઓથી નાગરિકો પરેશાન થાય છે, જેમ કે જે તે વિસ્તાર વરસાદી પાણીમાં ગરકાવ થઈ જાય, દૂષિત પાણી, ગટરો ઊભરાવી, રસ્તા પરનો કાદવકીચડ, ખાડા-ટેકરા, રખડતાં ઢોર અને બંધ સ્ટ્રીટલાઇટથી લોકો તોબા પોકારી ઊઠે છે, પરંતુ મ્યુનિ. તંત્ર દ્વારા ભરચોમાસાના આ દિવસોમાં પણ સ્ટ્રીટલાઇટને ચાલુ રખાઈ છે, જેના કારણે વરસતા વરસાદ વચ્ચે વાહનચાલકો કે પગપાળા જનારાઓને અંધારાં ઉલેચવાની ફરજ પડી નથી.

ચોમાસામાં સ્ટ્રીટલાઇટને બંધ થતાં વાર લાગતી નથી, કેમ કે વરસાદના દિવસોમાં અવારનવાર કેબલ ફોલ્ટના બનાવ બને છે. વરસાદી માહોલમાં જો સ્ટ્રીટલાઇટ બંધ હોય તેવા સમયે રસ્તા પર વાહન હંકારવું કે પગપાળા ચાલવું લોકો માટે મુસીબતરૂપ બને છે. બંધ સ્ટ્રીટલાઇટથી પડવા-આખડવાના બનાવથી નાગરિકોના જીવ પર જોખમ પણ ઊભું થાય છે.