સોશિયલ મીડિયાઃ સૌથી ‘ઘાતક’ શસ્ત્ર

સોશિયલ મીડિયા હવે તો નફરતનું ઝેર ઓકવા અને સમાજને વિભાજિત કરવાનું પણ એક ખતરનાક શસ્ત્ર પણ બનતું જાય છે

કોઈ પણ નવી ટેક્નોલોજી કે સુવિધા જેટલી ઉપયોગી હોય છે, આપણા જીવનને જેટલી સરળ બનાવે છે, તેની દુરોગામી અસરો પણ એટલી જ ભયાનક અને મજબૂત હોય છે. વિવેક બુદ્ધિ સાથે જો તેનો ઉપયોગ કરવામાં ન આવે તો આ ટેક્નોલોજી એક ઘાતક શસ્ત્ર પણ પુરવાર થઈ શકે છે. સોશિયલ મીડિયાનું પણ કંઈક આવું જ છે. આજે લગભગ દરેક વ્યક્તિ તેનો મોટાભાગનો સમય સોશિયલ મીડિયા પર જ પસાર કરવાનું પસંદ કરે છે. આ આભાસી દુનિયા ધીમેધીમે આપણા સૌ પર હાવિ થઈ રહી છે અને તેની આદત આપણી અંદર અનેક પ્રકારની નકારાત્મકતા પણ ભરી રહી છે.

થોડા સમય પહેલા જ સુપ્રીમ કોર્ટના જસ્ટિસ જે.બી. પારડીવાલાએ સંસદને સોશિયલ મીડિયા પર નિયંત્રણો લાદવા માટે કાયદો બનાવવાની સલાહ આપી હતી. તેમણે સોશિયલ મીડિયા વિશે બળાપો ઠાલવતાં જણાવ્યું હતું કે, અડધું સત્ય, અધૂરી માહિતી ધરાવતા લોકો અને કાયદાના શાસન, પુરાવા, ન્યાયિક પ્રક્રિયા અને સરહદોને નહીં સમજનારા લોકોનું પ્રભુત્વ સોશિયલ મીડિયા પર વધી ગયું છે. તેમની આ વાત ભલે અતિશયોક્તિભરી લાગે, પરંતુ તેમાં મહદ્અંશે સચ્ચાઈ તો છે જ.