રક્ષાબંધન પર્વ નિમિત્તે AMTSમાં મહિલાઓ રૂ. દસમાં આખો દિવસ મુસાફરી કરી શકશે

ગુરુવારે બાળકો માટે પણ રૂ. પાંચની ટિકિટ રખાશે

અમદાવાદ, સોમવાર

પાછલાં કેટલાંક વર્ષોથી ભાઈબહેનના પવિત્ર પ્રેમની સૌગાત લઈને આવનાર રક્ષાબંધન પર્વ નિમિત્તે બહેનો તેમના માડીના જાયાને ત્યાં જઈને રક્ષાનું સૂત્ર બાંધીને મંગળ આશિષ આપી શકે તેવા આશયથી એએમટીએસ બસની મનપસંદ ટિકિટના ભાડામાં ધરખમ ઘટાડો કરવામાં આવે છે. આ રક્ષાબંધનના પવિત્ર પર્વ નિમિત્તે પણ એએમટીએસમાં મહિલાઓ રૂ. દસમાં એએમટીએસ શરૂ થાય ત્યારથી એએમટીએસ બંધ થાય ત્યાં સુધી મુસાફરી કરી શકશે.

એએમટીએસના ચેરમેન વલ્લભ પટેલ કહે છે, ''પ્રતિ વર્ષની જેમ આ વર્ષે પણ રક્ષાબંધન પર્વ નિમિત્તે મહિલા મુસાફરોને મનપસંદ ટિકિટમાં ૫૦ ટકાની છૂટ અપાશે.''

તંત્ર દ્વારા ગત તા. ૩ ઓગસ્ટે આને લગતો ખાસ પરિપત્ર બહાર પડાયો છે, જે અંતર્ગત તા. ૧૧ ઓગસ્ટ, ગુરુવારે રક્ષાબંધન હોઈ ફક્ત આ તહેવાર પૂરતું મહિલાઓ માટે રૂ. દસની મનપસંદ ટિકિટ રખાશે, જેમાં મહિલાઓ પ્રથમ પાળીથી રાતની બીજી પાળી પૂરી થવાના સમય સુધી રૂ. દસમાં મુસાફરી કરી શકશે, જ્યારે બાળકો માટે ફક્ત રક્ષાબંધન પૂરતું મનપસંદ ટિકિટનું ભાડું રૂ. પાંચ રખાયું છે.