સૌને આશરો-સૌને આવાસઃ PM આવાસ યોજનાથી દરેકનું ઘરનું સપનું થયું સાકાર

પ્રધાનમંત્રી આવાસ યોજનામાં ગુજરાત દેશમાં અગ્રેસર કુલ ૭.૬૪ લાખ આવાસોના લક્ષ્યાંક સામે કુલ ૮.૬૧ લાખ આવાસ મંજૂર કર્યા, જે પૈકી ૬.૨૪ લાખ જેટલા આવાસોનાં બાંધકામ પૂર્ણ

અમદાવાદ, બુધવાર

શહેરમાં વસનારી કે ગ્રામીણ વિસ્તારની દરેક વ્યક્તિની ત્રણ પાયાની જરૂરિયાત હોય છે-રોટી, કપડાં અને મકાન. સર્વગ્રાહી વિકાસના પરિણામે ગુજરાતમાં ઉદ્યોગ, વેપાર-ધંધા અર્થે દેશના અનેક પ્રદેશના લોકો આવીને વસ્યા છે. આવા લોકોને આજીવિકા તો મળી રહે છે, પરંતુ મકાન અને તે પણ પોતાની માલિકીનું હોવું તે સપનું સાકાર થવું બહુ કપરું હોય છે. આજના આ મોંઘવારીના યુગમાં ઓછી આવક ધરાવતા પરિવારો માટે પોતાનું ઘર બનાવવું એક સ્વપ્ન સમાન હોય છે.

પોતાના જીવનની મોટા ભાગની કમાણીની બચત કરીને અથવા તો લોન લઇને પોતાનું ઘર બનાવવા સામાન્ય માનવી તનતોડ મહેનત કરતો હોય છે. પોતાનું ઘર હોવું એ ગરીબ અને મધ્યમવર્ગના લોકો માટે એક ગેરંટીરૂપ હોય છે. કપરાકાળમાં પોતાનું ઘર હોવું એ ધરતીનો છેડો ઘર એવા સુખનો અહેસાસ કરાવે છે.

વડા પ્રધાન નરેન્દ્ર મોદીએ ગરીબોને પોતાનું ઘર મળે તે માટે હાઉસિંગ સેક્ટરમાં ઘણા બધા ફેરફાર કર્યા છે. સૌના માટે આવાસની નેમ સાથે પ્રધાનમંત્રી આવાસ યોજના તેમની પ્રેરણાથી શરૂ થઇ છે.