નિકોલ હત્યા કેસમાં નવો વળાંક: હત્યારો વ્યાજખોર નહીં, ફર્નિચરનો કારીગર હતો!

સ્પા સેન્ટરના માલિકે ફર્નિચરના કારીગરને વગર કારણે ગાળો ભાંડી હતી: વ્યાજનાં ચક્કરમાં હત્યા થઇ હોવાની થિયરી પર બે વ્યાજખોરની ધરપકડ કરાઈ હતી

અમદાવાદ, ગુરુવાર

નિકોલ વિસ્તારમાં શહેરના સ્પા સેન્ટરના માલિકના થયેલા હત્યાકેસમાં નવો વળાંક આવતાં પોલીસ તેમજ મૃતકના પરિવારજનો પણ ચોંકી ઊઠ્યા છે. વ્યાજખોરોએ સ્પા સેન્ટરના સંચાલકની હત્યા કરી હોવાની થિયરી પર ગુનો દાખલ કરીને પોલીસે બે લોકોની ધરપકડ કરી હતી. જોકે તપાસ દરમિયાન જાણવા મળ્યું હતું કે સંચાલકની હત્યા પાછળ વ્યાજખોર નહીં પરંતુ ફર્નિચરનો કારીગર જવાબદાર છે. પોલીસે ફર્નિચરનું કામ કરતા કારીગરની ધરપકડ કરીને સમગ્ર હત્યાકાંડનો ભેદ ઉકેલી દીધો છે. પોલીસ હાલ ત્રણેય વ્યાજખોરને શંકાના દાયરામાં રાખીને પૂછપરછ કરી રહી છે.