મ્યુનિસિપલ તંત્ર દ્વારા હવે વધુ પાંચ જિમ્નેશિયમનું ખાનગીકરણ કરાશે

જોધપુર અને નારણપુરામાં યુવા વર્ગને એસી-જિમનો લહાવો મળશે

અમદાવાદ, શુક્રવાર

મ્યુનિસિપલ કોર્પોરેશન દ્વારા એક અથવા બીજા પ્રકારની પ્રજાકીય સેવાનાં કામોમાં ખર્ચ બચાવવા માટે ખાનગીકરણને પ્રોત્સાહન અપાઈ રહ્યું છે. વધુ ને વધુ પ્રોજેક્ટને ચલાવવા માટે પીપીપી ધોરણે ખાનગી સંસ્થાઓ સાથે તંત્ર દ્વારા કરાર કરાઈ રહ્યા છે. હવે સત્તાવાળાઓ બે એસી સહિત પાંચ જિમ્નેશિયમનું ખાનગીકરણ કરવા જઈ રહ્યા છે.

તંત્ર હસ્તકનાં જિમ્નેશિયમ પીપીપી ધોરણે ચલાવવા માટેનાં ટેન્ડર પ્રસિદ્ધ કરાયાં છે, જે ૨૧ નવેમ્બર ભરી પરત આપવાનાં રહેશે. તંત્ર દ્વારા હાલમાં નવા બની રહેલાં જોધપુર, નારણપુરા, વેજલપુર, વટવા-લાંભા અને વટવા જિમ્નેશિયમ માટેનાં ટેન્ડર બહાર પાડવામાં આવ્યાં છે.