ચૂંટણીનો ટેમ્પો જામ્યોઃ આજે PM મોદી-રાહુલ ગાંધી, કેજરીવાલનો ઝંઝાવાતી પ્રચાર

વિવિધ રાજકીય પક્ષોના દિગ્ગજ નેતાઓ સભા ગજાવશે અને રોડ શો કરી મતદાર રાજાઓને લોભાવશે

અમદાવાદ, સોમવાર

ગુજરાત વિધાનસભાની પહેલા તબક્કાની ચૂંટણી આડે હવે ગણતરીના દિવસો બાકી રહ્યા છે. તા. ૧ ડિસેમ્બરે સૌરાષ્ટ્ર-કચ્છ અને દક્ષિણ ગુજરાતના ૧૯ જિલ્લાની ૮૯ બેઠક પર મતદાન થવાનુ હોઈ રાષ્ટ્રીય સ્તરના નેતાઓ રાજ્યનો ચૂંટણી પ્રવાસ ખેડી રહ્યા છે. વડા પ્રધાન નરેન્દ્ર મોદીના ગુજરાત પ્રવાસથી ચૂંટણીના ગરમાવો વાતાવરણમાં આવ્યો છે, જોકે મતદારો હજુ પણ અકળ મન ધરાવતા હોઈ રાજકીય પક્ષો દ્વિધામાં છે. ચૂંટણીનો ટેમ્પો જામ્યો હોઈ વડા પ્રધાન નરેન્દ્ર મોદી આજે સુરેન્દ્રનગર, જંબુસર અને નવસારીમાં ચૂંટણી સભાને ગજાવશે. કેન્દ્રીય ગૃહપ્રધાન અમિત શાહ પણ ખંભાળિયા, કોડિનાર, માળિયા-હાટિના અને ભૂજમાં સભાને સંબોધશે. કોંગ્રેસના પૂર્વ રાષ્ટ્રીય અધ્યક્ષ રાહુલ ગાંધી પણ ઝંઝાવાતી પ્રચાર કરશે. તેઓ મહુવા અને રાજકોટમાં જન સભા કરશે.