શહેરમાં સવારે ઠંડી, બપોરે ગરમી અને રાતે વરસાદની ટ્રિપલ સિઝન

છેક ગુરુવારે આકાશ સ્વચ્છ થતાં ગરમીના પ્રકોપમાં આંશિક વધારો થશે

અમદાવાદ, સોમવારઃ

ફાંટાબાજ કુદરતના કરિશ્માના કારણે અમદાવાદીઓ ભારે પરેશાન થઈ ચૂક્યા છે. અત્યારે શહેરના વાતાવરણમાં સવારે ઠંડીથી શિયાળો, બપોરે ગરમીથી ઉનાળો અને રાત્રે વરસાદથી ચોમાસું – એમ ટ્રિપલ સિઝન ચાલી રહી છે. આ પ્રકારે ફાગણમાં કુદરતે રંગ બદલ્યો હોય તેવું ભાગ્યે જ જોવા મળ્યું છે તેમ વડીલ-વૃદ્ધો જણાવી રહ્યા છે. જોકે આવા મુશ્કેલીભર્યા માહોલથી વૃદ્ધો સહિત બાળકોમાં તાવ, કફ, શરદીનો રોગચાળો ફેલાયો છે.