અતીક અહેમદનાં કરતૂતોથી યુપી પોલીસ પરેશાનઃ અમદાવાદના ધક્કા વધી ગયા

પાંચ કરોડની ખંડણી માગવાના કેસમાં અતીકના રિમાન્ડ મંજૂરઃ યુપી પોલીસે સાબરમતી જેલમાં કોર્ટનો ઓર્ડર જમા કરાવ્યો

અમદાવાદ, સોમવાર

ઉત્તરપ્રદેશના બાહુબલી ગેંગસ્ટર અતીક અહેમદનાં કરતૂતોથી યુપી પોલીસ પરેશાન થઇ ગઇ હોય તેવું લાગી રહ્યું છે. ઉમેશ પાલ અપહરણકાંડમાં અતીક અહેમદને આજીવન કેદની સજા પડ્યા બાદ હવે જીશાન નામના યુવક પાસે પાંચ કરોડની ખંડણી માગવાનો કેસ સામે આવ્યો છે. પાંચ કરોડ રૂપિયાના ખંડણીના કેસમાં યુપી પોલીસ અતીક અહેમદની ગમે ત્યારે ધરપકડ કરીને ઉત્તરપ્રદેશ પૂછપરછ માટે લઇ જઇ શકે છે અથવા તો સાબરમતી જેલમાં જ તેની પૂછપરછ થઇ શકે છે. પાંચ કરોડ રૂપિયાની ખંડણીનો કેસ ખૂલતાંની સાથે જ હવે યુપી પોલીસના અમદાવાદમાં ધક્કા વધી ગયા છે ત્યારે આજે સવારે પીએસઆઇ રેન્કના એક અધિકારી, જે યુપીમાં ફરજ બજાવે છે તે સાબરમતી સેન્ટ્રલ જેલમાં કોર્ટનો ઓર્ડર લઇને આવ્યા છે.