‘તમારા પાર્સલમાંથી ૩૫૦ ગ્રામ ડ્રગ્સ મળ્યું છે કહી યુવતી પાસેથી ચાર લાખ ખંખેરી લીધા

ઈન્ટિરિયર ડિઝાઈનર યુવતીનું પાર્સલ ન હોવા છતાં ઠગબાજોએ નાર્કોટિક્સ વિભાગ, ક્રાઇમ બ્રાન્યતી ઓળખ આપી તેને ફસાવી હતી

અમદાવાદ, બુધવાર

સાઉથ બોપલમાં રહેતી ઇન્ટિરિયર ડિઝાઈનર યુવતીને ‘તમારા પાર્સલમાંથી ૩૫૦ ગ્રામ ડ્રગ્સ મળ્યું છે' તેમ કહીને નાર્કોટિક્સ વિભાગ, ક્રાઇમ બ્રાન્ચની ઓળખ આપી ઠગબાજોએ ચાર લાખ રૂપિયા પડાવી લીધા છે. યુવતીનું કુરિયર ન હોવા છતાં ઠગબાજોએ તેને જાળમાં ફસાવી હતી.

સાઉથ બોપલમાં રહેતી અને પ્રહ્લાદનગર ખાતે એક સ્ટુડિયોમાં ઇન્ટિરિયર ડિઝાઈનર તરીકે નોકરી કરતી હિના દોશીએ બોપલ પોલીસ સ્ટેશનમાં ફરિયાદ નોંધાવી છે. તારીખ ૨૬-૦૧-૨૦૨૩ના રોજ હિના તેના ઘરે હાજર હતી. ત્યારે સવારના સમયે અજાણ્યા નંબર પરથી ફોન આવ્યો હતો.