ઘૂસણખોરીનો કરોડો રૂપિયાનો ‘ખેલ’: એજન્ટોનું નેટવર્ક તોડવા પોલીસ મેદાને

ચકચારી કેસમાં બે એજન્ટોની ધરપકડ બાદ હૈદરાબાદના એજન્ટ સહિતના લોકોની કુંડળી પોલીસને મળશેઃ નરોડાના દંપતી સાથે બનેલો કિસ્સો વિદેશ જવા ઈચ્છુક લોકો માટે લાલ બત્તી સમાન

અમદાવાદ, બુધવાર

આજે યુવાઓને વિદેશમાં સેટલ થવાનું એટલી હદે ઘેલું લાગ્યું છે કે તે કરોડો રૂપિયા ખર્ચીને પણ ગેરકાયદે પહોંચી જાય છે. વિદેશમાં પહોંચાડવાનો ખેલ એટલો ખતરનાક છે કે તેમાં ઘણી વખત ગુજરાતીઓનાં મોત થયાં હોય છે, જ્યારે કેટલાક લોકોને બંધક બનાવી દેવામાં આવતા હોય છે. વિદેશમાં મોક્લી આપનાર લેભાગુ એજન્ટોને નક્કી થયેલી ડીલ પ્રમાણેના રૂપિયા નહીં મળતાં તે કોઇ પણ હિસાબે જે તે પેસેન્જરને ફસાવી દેતા હોય છે. નરોડાના દંપતીને ઇરાનમાં બંધક બનાવી દેવાના ચકચારી કિસ્સા બાદ પોલીસ અને એજન્સીઓ એલર્ટ થઈ છે અને એજન્ટોની ચેઇન ક્રેક કરવા માટે એક્ટિવ થઇ છે. વિદેશમાં ઘૂસણખોરીના આ મસમોટા કૌભાંડમાં વિવિધ રાજ્ય તેમજ દેશના એજન્ટો સક્રિય હોય છે.