દિલ્હી અને મુંબઈમાં અનરાધાર વરસાદ: ભુસ્ખલનથી બદરીનાથ હાઈવે ‘બ્લોક’

હવામાન વિભાગ દ્વારા આગામી પાંચ દિવસ મેઘતાંડવની ચેતવણી: દહેરાદૂન અને પૌડીમાં અતિભારે વરસાદનું એલર્ટ જારી: તંત્ર સાબદું

નવી દિલ્હી, શનિવાર

દેશનાં મોટા ભાગનાં રાજ્યોમાં મેઘકહેર જારી છે અને તેનાથી સામાન્ય જનજીવન અસ્તવ્યસ્ત બની ગયું છે. ખાસ કરીને દેશની રાષ્ટ્રીય રાજધાની દિલ્હી અને આર્થિક રાજધાની મુંબઈમાં સતત વરસી રહેલા અનરાધાર વરસાદના કારણે લોકો રીતસર ત્રાહિમામ્ પોકારી ગયા છે અને હવે મેઘરાજાને ખમૈયા કરવાની આજીજી કરી રહ્યા છે. દિલ્હી પોલીસે તો ટ્વિટર પર લોકો માટે ચેતવણી પણ જાહેર કરી દીધી છે, જેમાં પાણીમાં ગરકાવ થઈ ગયેલા રસ્તાઓની વિસ્તૃત જાણકારી આપીને લોકોને ઘરમાં જ રહેવાની અપીલ પણ કરવામાં આવી છે. મુંબઈમાં પણ લોકો રોડ પર પાણી ફરી વળતાં લાંબા ટ્રાફિક જામમાં ફસાઈ ગયા છે.