આવનારી પેઢી માટે સુંદર પર્યાવણ છોડવું પડશે

‘પર્યાવરણ દિવસ' વર્ષમાં એક વખત મનાવીને આપણી જવાબદારી પૂરી થતી નથી. આપણે આપણા દૈનિક જીવનમાં પર્યાવરણનું મહત્ત્વ સમજવું પડશે અને પર્યાવરણનાં રક્ષણની કોશિશ કરવી પડશે

આપણે વર્ષમાં એક દિવસ પર્યાવરણ દિવસની ઊજવણી કરીએ છીએ, પરંતુ તેનાથી આપણી જવાબદારી પૂર્ણ થતી નથી, કેમકે પર્યાવરણનું જતન કોઇ એક દિવસ કે વીક પૂરતું હોતું નથી. જેમ આપણે રોજ જમીએ છીએ, રોજ કસરત કરીએ છીએ, રોજ સુઇએ છીએ તે રીતે પર્યાવરણનું જતન પણ રોજ કરવાનું હોય છે.

પર્યાવરણ દિવસ વર્ષમાં એક વખત મનાવીને આપણી જવાબદારી પૂરી થતી નથી. આપણે આપણા દૈનિક જીવનમાં પર્યાવરણનું મહત્ત્વ સમજવું પડશે અને પર્યાવરણનાં રક્ષણની કોશિશ કરવી પડશે. માત્ર ઔપચારિકતાથી આપણે આપણું લક્ષ્ય હાંસલ નહીં કરી શકીએ. જ્યાં સુધી પર્યાવરણના રક્ષણની વાત છે તો લક્ષ્ય એ છે કે બ્રહ્માંડ આપણને જે અવસ્થામાં મળ્યું છે, તેને વધુ સુંદર બનાવીને આવનારી પેઢી માટે છોડી જઇએ.

જો તેને વધુ સુંદર ન બનાવીએ તો કમસે કમ તેને ખરાબ તો ન કરીએ. આ માટે દરેક નાગરિકને દેશ, વિશ્વ, અને આવનારી પેઢીઓ પ્રત્યે આપણું યોગદાન ક્રિયાત્મક રીતે આપવું પડશે. ઉદાહરણ તરીકે દરેક વ્યક્તિ માને છે કે પોલિથિન અને પ્લાસ્ટિક પર્યાવરણ માટે સૌથી મોટા ઘાતક છે. સરકારે કાયદા તો બનાવી લીધા, પરંતુ તેને લાગુ કરવામાં વ્યક્તિ અને સમાજનું યોગદાન અતિ આવશ્યક છે.