નવસારીમાં રાત્રે ચાર કલાકમાં ૧૦ ઈંચ વરસાદ ખાબકતાં જનજીવન ખોરવાયું

સુરતના મહુવામાં છેલ્લા ૨૪ કલાકમાં સાંબેલાધાર ૧૨ ઈંચ વરસાદઃ આજે પણ વલસાડ અને નવસારીને મેઘરાજા ધમરોળશે

અમદાવાદ, શુક્રવાર

વરસાદના ત્રીજા રાઉન્ડ હેઠળ નવસારીમાં મેઘરાજાએ ચારેકોર આફત સર્જી છે. રાત્રે ચાર કલાકમાં નવસારીમાં દસ ઈંચ જેટલો વરસાદ ખાબકતાં ઠેર ઠેર નીચાણવાળા વિસ્તારમાં પાણી ભરાઈ ગયાં છે. ભારે વરસાદના પગલે જિલ્લાની તમામ શાળાઓમાં આજે રજા જાહેર કરાઈ છે. શહેરીજનોમાં ભારે ચિંતાનો માહોલ પ્રસરી ગયો છે. હાલમાં જિલ્લા વહીવટી તંત્ર એલર્ટ મોડમાં આવી ગયું છે.

સમગ્ર દક્ષિણ ગુજરાતમાં ભારે વરસાદની અસર જોવા મળી રહી છે. ઔરંગા નદીમાં પૂરની સ્થિતિનું નિર્માણ થયું છે, જ્યારે પૂર્ણા નદીનું જળ સ્તર વધવાથી નીચાણવાળા વિસ્તારોમાં હાહાકાર ફેલાયો છે. નવસારીમાં તો રીતસર આભ ફાટી નીકળતાં લોકો બેબાકળા બન્યા છે.