હવે અમદાવાદ સહિત રાજ્યભરમાં કડકડતી ઠંડીનાં મંડાણ થશે

અમદાવાદીઓએ પણ હવે આગામી સપ્તાહ કાતિલ ઠંડીનો સામનો કરવા તૈયાર રહેવું પડશેઃ હવામાત નિષ્ણાતોની આગાહી

આજે નવેમ્બર મહિનાનો અંતિમ દિવસ છે અને વર્ષનો અંતિમ મહિનો એટલે કે ડિસેમ્બર દસ્તક દેવા તૈયાર છે ત્યારે પણ હજુ સુધી અમદાવાદ સહિત રાજ્યભરમાં જોઈએ તેવી ઠંડી અનુભવાઈ નથી. સ્થાનિક હવામાન વિભાગ અને કેટલાક હવામાન નિષ્ણાતોએ તેમની નવી આગાહીમાં જણાવ્યું છે કે હવે સમગ્ર ગુજરાતમાં કડકડતી ઠંડીનાં મંડાણ થશે. જાણે આ આગાહીને સાચી સાબિત કરતા હોય તે રીતે આજે રાજ્યનાં અનેક શહેરોનું લઘુતમ તાપમાન ૨૦ ડિગ્રીની નીચે ગગડ્યું છે. ૧૩ ડિગ્રી લઘુતમ તાપમાન સાથે કચ્છનું નલિયા આજે રાજ્યનું સૌથી ઠંડું શહેર બન્યું છે.