અચાનક મોતનું કારણ કોરોના વેક્સિન નહીં, પણ ખરાબ લાઈફસ્ટાઈલઃ નડ્ડાએ સંસદમાં ICMRનો રિપોર્ટ રજૂ કર્યો

રિસર્ચમાં ૧૯ રાજ્યનાં સેમ્પલ લેવામાં આવ્યાં

આઈસીએમઆરના નવા રિસર્ચ એ અફવાઓને ફગાવી દીધી છે, જેણે કોવિડ વેક્સિનેશનને અચાનક મૃત્યુનું કારણ ગણાવ્યું હતું. કેન્દ્રીય આરોગ્યપ્રધાન જે.પી. નડ્ડાએ ગઈ કાલે રાજ્યસભામાં જણાવ્યું હતું કે ઇન્ડિયન કાઉન્સિલ ઓફ મેડિકલ રિસર્ચના સંશોધનમાં સ્પષ્ટ થઈ ગયું છે કે કોરોનાની રસીથી ભારતમાં યુવાનો અને પુખ્ત વયના લોકોમાં અચાનક મૃત્યુનું જોખમ વધ્યું નથી. તેમણે કહ્યું હતું કે હકીકતમાં આઈસીએમઆરનો રિપોર્ટ દર્શાવે છે કે કોરોના વેક્સિન આવાં મૃત્યુની શક્યતા ઘટાડે છે. આઈસીએમઆરએ પોતાના રિપોર્ટમાં એ આશંકાઓને દૂર કરવાનો પ્રયાસ કર્યો છે કે છેલ્લાં કેટલાંક વર્ષોમાં ભારતમાં યુવાનો અને પુખ્ત વયના લોકોનાં અકાળે મૃત્યુ કોરોના વેક્સિનેશન સાથે સંબંધિત હતાં.