મેમો આપતાં જ રિક્ષાચાલકે મારે આત્મહત્યા કરવી છે' તેમ કહી માથું દીવાલમાં અથડાવ્યું

રિક્ષાચાલકે પુત્ર સાથે મળીને બીબીસી માર્કેટ રોડ માથે લીધોઃ અર્ધ નગ્ન થઈને જાહેર રોડ પર તમાશો કરતાં ફરિયાદ

કાલુપુર પોલીસ સ્ટેશનમાં સંજય ઠાકોર અને અમિત ઠાકોર (બંને રહે. કિંજલ સોસાયટી, વટવા) વિરુદ્ધ કામગીરીમાં અડચણ ઊભી કરવી અને આત્મહત્યા કરવાની ધમકી આપવાની ફરિયાદ કરી છે. પીએસઆઇ બી.યુ.મુરિયા અને તેમની ટીમ કાલુપુર બીબીસી માર્કેટ પાસે ટ્રાફિક નિયમન કરતા હતા ત્યારે બે શખ્સ પોતાની લોડિંગ રિક્ષા બીબીસી માર્કેટ પાસે ઊભી રાખી હતી. લોડિંગ રિક્ષા ઊભી હોવાના કારણે ટ્રાફિક જામની સમસ્યા સર્જાઇ હતી. તરત જ પીએસઆઇ બી.યુ.મુરિયાએ ટીઆરબી જવાન દિનેશને રિક્ષાચાલકને શોધી લાવવાનો આદેશ કર્યો હતો. ટીઆરબી જવાન જ્યારે લોડિંગ રિક્ષા પાસે પહોંચ્યો ત્યારે ચાલકે તેની સાથે બબાલ કરી દીધી હતી.