તસ્કરોના ઓછાયા વચ્ચે ચાંદખેડાના રહીશો સતર્ક બન્યાઃ ઘરને બે તાળાં મારવા લાગ્યા

થોડા દિવસ પહેલાં ચાંદખેડાની વિસામો સોસાયટીમાં થયેલી ચોરીના પગલે રહીશોમાં ડર ફેલાયોઃ આખો દિવસ ઘરમાં તાળાં લગાવી રાખે છે

હાડ થીજાવતી ઠંડીમાં જ્યારે અમદાવાદીઓ મોડી રાતે મીઠી નીંદર માણતા હોય છે ત્યારે તસ્કરો તરખાટ મચાવવા માટે મેદાનમાં ઊતરતા હોય છે. તસ્કરો શિયાળામાં મોડી રાતે ચોરી કરવાનું સૌથી વધુ પસંદ કરતા હોય છે, કારણ કે ઠંડીના કારણે સિક્યોરિટી ગાર્ડ તેમજ લોકો વહેલા સૂઈ જતા હોય છે. ચાંદખેડાની વિસામો સોસાયટી માં થોડા દિવસ પહેલાં તસ્કરોએ આતંક મચાવીને ત્રણથી વધુ મકાન માં ચોરી કરી હતી. આ ઘટના બાદ ચાંદખેડાના રહીશો તસ્કરોના ત્રાસથી ભયમાં જીવી રહ્યા છે અને સતર્ક બનીને પોતાના ઘરમાં એક નહીં, પરંતુ બે તાળાં લગાવી રહ્યા છે. ચાંદખેડાના પાર્શ્વનાથનગરના રહીશો ધોળા દિવસે અને મોડી રાતે પોતાના ઘરમાં બે તાળાં લગાવી રાખે છે.

શિયાળામાં તસ્કરો ઘરફોડ ચોરી કરવા માટે તૈયાર છે, જ્યારે તેની સામે પોલીસ પણ આવા તસ્કરોને રોકવા માટે એડીચોટીનું જોર લગાવી રહી છે. શહેરમાં ગુનાખોરીનો ગ્રાફ નીચો લાવવા માટે પોલીસે ઠેરઠેર કોમ્બિંગ શરૂ છે અને કાતિલ ઠંડીમાં મોડી રાતે તમામ વાહનોનું ચેકિંગ કરવામાં આવી રહ્યું છે. પોલીસની કામગીરીથી અમદાવાદીઓ ડરી રહ્યા છે, પરંતુ ગુનેગારોના પેટનું પાણી પણ હાલતું નથી. પોલીસ રસ્તા પર ગમે એટલું ચેકિંગ કરે પરંતુ ગુનેગારો ગુનાખોરીની ઘટનાને અંજામ આપવા માટે તૈયાર હોય છે. થોડા દિવસ પહેલાં પોલીસ કોમ્બિંગ વચ્ચે ચાંદખેડામાં આવેલી વિસામો સોસાયટીમાં ઘરફોડ ચોરીની ઘટના બની હતી.