చెరగని కవిత్వ సంతకం శేషేంద్ర

కాలం నిన్ను ప్రశ్నిస్తోంది. నీవు ప్రజల పక్షాన నిలబడదలిస్తే కలంతో కదిలివచ్చి, వాళ్ల గుండెల మీద ముద్ర పడేలా రాయి. వాళ్ల జీవితాన్ని వాళ్ల భాషలోనే చెప్పు" అంటారు మహాకవి శేషేంద్ర.

-  డా॥ బీరం సుందరరావు

డా॥ గుంటూరు శేషేంద్ర శర్మ అసలు సిసలైన ప్రజాకవి. యుగధర్మాన్ని ప్రతిబింబిస్తూ మహత్తర కావ్యాలు రాసిన యుగకవి. వాదాలు, వివాదాలు చుట్టుముట్టినా, అరసాలు, విరసాలు వీరంగం వేసినా, సమకాలీన కవులు గుర్తించకపోయినా, విమర్శకులు సరిగా అర్థం చేసుకోలేకపోయినా, అన్నింటికీ అతీతంగా, కవిత్వమే ప్రాణశ్వాసగా, సరికొత్త కవిత్వపు మేనిఫెస్టోను లోకానికి బహూకరించిన కవిసేనా నాయకుడు శేషేంద్ర. కవిత్వానికి విప్లవ భాషను నేర్పిన భాష విప్లవ భాషా విధాత శేషేంద్ర. శబ్దాల్ని మైనపు ముద్దల్లా చేసి, అర్థాలకు అర్హతను అద్ది, హృదయాలను కవిత్వంతో రసాప్లావితం చేసిన కవితా రసావతారుడు శేషేంద్ర. శేషేంద్రను ఎన్ని కోణాల నుంచి చూసినా విలక్షణంగా కన్పిస్తారు, విశిష్టంగా దర్శనమిస్తారు. "ఆధునిక మహాభారతం"లో ప్రతి కవిత ప్రతి అభివ్యక్తీ. శేషేంద్ర శర్మ సామాజిక దృష్టికి, సాహిత్య స్పృహకు ప్రతీకగా నిలుస్తుంది. నవ్య కవితా సృష్టి పతాకగా దర్శనమిస్తుంది.