పుచ్చు వంకాయలు

సింగిల్ పేజీ కథ

- ఆర్.సి. కృష్ణస్వామిరాజు

కూతురు 'కాగిత కాకినాడలో కొత్తగా కాపురం పెట్టింది. అల్లుడు అరవింద్ కూత ఎల్.ఐ.సి.లో అసిస్టెంట్ ఉద్యోగం చేస్తున్నాడు. కొత్త సంవత్సరం వేడుకలు కూతురు, అల్లుడుతో కలిసి చేసుకుందామని అనుకున్నా డు కాగిత తండ్రి మేఘనాథం. మచిలీపట్నం నుంచి ఏసీ బస్సులో బయలుదేరాడు. తెల్లారేసరికి కాకినాడ చేరాడు.

అల్లుడూ, కూతురూ అభిమానంగా పలకరించారు. 'చూడచక్కని జంట' అని సంతోషపడ్డాడు మేఘనాథం.

ఆరోజు డిసెంబరు 30వ తేదీ..

“మా నాన్నకు మునక్కాయలంటే మహా ఇష్టం. మార్కెట్కు వెళ్లి మునక్కాయలు తీసుకురండి" అని భర్త చేతికి బ్యాగు ఇచ్చింది.

“వెళ్లక తప్పదా?" అన్నట్లుగా ముఖం పెట్టాడు అరవింద్.

తప్పదన్నట్లుగా చెప్పకనే చెప్పింది కాగిత.

కాళ్లీడ్చుకుంటూ వెళ్లి మార్కెట్ అంతా తిరిగి ఇరవై రూపాయలు పెట్టి నాలుగు మునక్కాయలు కొనుక్కొచ్చాడు. తెచ్చినవి ముదురు మునక్కాయలని కాగిత తన మూతిని మూడు వంకర్లు తిప్పింది.

“నాకు ముదురు మునక్కాయలంటేనే ఇష్టం” అని సర్దిచెప్పాడు.మేఘనాథం.

డిసెంబరు 31వ తేది.

"మా నాన్నకు పందిరి చిక్కుడుకాయలంటే ఇష్టం.పప్పుల పొడి వేసి తాలింపు చేస్తే తృప్తిగా తింటాడు" అని చెప్పి మొగుణ్ణి మార్కెట్కి పొమ్మంది.