മെസിക്കിസകൾ കെസ്സുകൾ, കിനാവുകൾ

 ഒരു ക്യാപ്റ്റനെന്ന നിലയിൽ, തന്റെ ടീമംഗങ്ങളെ, കാണികളെ, തന്നെത്തന്നെ ലയണൽ മെസ്സി ഓരോ നിമിഷവും പ്രചോദിപ്പിച്ചു കൊണ്ടേയിരുന്നു. ഖത്തറിലെത്തി അർജന്റീനയുടെ മത്സരങ്ങൾ കണ്ട ഗാനരചയിതാവ് ബി.കെ. ഹരിനാരായണൻ എഴുതുന്നു ഒരു ക്യാപ്റ്റനെന്ന നിലയിൽ, തന്റെ ടീമംഗങ്ങളെ, കാണികളെ, തന്നെത്തന്നെ ലയണൽ മെസ്സി ഓരോ നിമിഷവും പ്രചോദിപ്പിച്ചു കൊണ്ടേയിരുന്നു. ഖത്തറിലെത്തി അർജന്റീനയുടെ മത്സരങ്ങൾ കണ്ട ഗാനരചയിതാവ് ബി.കെ. ഹരിനാരായണൻ എഴുതുന്നു 19

-  ബി.കെ. ഹരിനാരായണൻ

അർജന്റീനയും ഓസ്ട്രേലിയയും തമ്മിലുള്ള പ്രീ ക്വാർട്ടർ പോരാട്ടം കാണാൻ അഹമ്മദ് ബിൻ അലി സ്റ്റേഡിയത്തിലേക്ക് മെട്രോ കാത്തു നിൽക്കുമ്പോൾ, തൊട്ടടുത്തു നിന്ന് മെസ്സിയുടെ ജേഴ്സി ഇട്ട ഇറാഖുകാരൻ പറഞ്ഞു - “ഞാൻ, സ്പെയിനിന്റെ ആരാധകനാണ്. എനിക്ക് അർജന്റീനയോട് ഒരു താത്പര്യവുമില്ല. പക്ഷെ ഞാൻ മെസ്സിയുടെ ആരാധകനാണ്. ഇക്കുറി അയാൾ വേൾഡ് കപ്പ് എടുക്കണം.

പെട്ടെന്ന് ഓർമ്മവന്നത് പോർക്കുളത്തെ ബാർബർ പ്രദീപിനെയാണ്. തിരുത്തിക്കാട്ട് റോഡ് തിരിയുന്നിടത്തെ, തന്റെ സലൂണിന്റെ മുന്നിലെ ചില്ല് നിറയാൻ പാകത്തിൽ നെയ്മറുടെ ചിത്രം വച്ചിട്ടുണ്ട് അയാൾ. കട്ട ബ്രസീൽ ഫാനാണ്. മെസ്സിയെക്കുറിച്ച് സംസാരിക്കുന്നതിനിടെ മുടിവെട്ടുന്ന കൃതിക മാറ്റി, ചെവിയ്ക്കരികിൽ വന്ന് പതുക്കെ പറഞ്ഞു.

“അങ്ങനെ പറഞ്ഞാ, മെസ്സേ മ്മക്ക് ഭയങ്കര ഇഷ്ടാ, അയാള് ന്ന് ലോകത്തിലെ ഒന്നാം നമ്പറ് കളിക്കാരനാ. പക്ഷേ അത് മിണ്ടാൻ അർജന്റീനക്കാർ പറ്റില്ലല്ലോ. ഈക്ക് അഹങ്കാരം കൂടില്യേ .

ഖത്തറിൽ ഓരോ കളികളും ആരംഭിക്കുന്നത് മൈതാനങ്ങളിൽ നിന്നല്ല, മെട്രോകളിൽ നിന്നാണെന്ന് തോന്നിയിട്ടുണ്ട്. അതിൽ തിങ്ങി നിറഞ്ഞു നിൽക്കുന്നവരുടെ ചിന്തകളിൽ നിന്ന്, ഉറക്കെയുറക്കെയുള്ള സംസാരങ്ങളിൽ നിന്ന്, ഗന്ധങ്ങളിൽ നിന്ന്, ആരവങ്ങളിൽ നിന്ന്, പാട്ടുകളിൽ നിന്ന്, അടരടരുകളായി ഓരോ കളികളും ഉരുത്തിരിഞ്ഞുവരുന്നു. പിന്നെ മൈതാനത്തിൽ അതിന്റെ തുടർച്ചയുണ്ടാകുന്നു. ലോങ്വിസിൽ മുഴുങ്ങിയാലും തീരാതെ അത് തിരിച്ച് പോക്കിന്റെ മെട്രോകളിലേക്ക് പടരുന്നു. പിന്നെ, ഫാൻ സോണുകൾ കളി ഏറ്റെടുക്കുന്നു.

പുലർച്ചയിൽ ഏതോ കാണിയുടെ കാലുകൊണ്ട്, ആ പന്തിനെ ആകാശത്തേക്ക് തൊടുത്തുവിടുകയും അതൊരു സൂര്യനായി മാറുകയും ചെയ്യുമ്പോൾ കളി അവസാനിക്കുന്നു.

ആ മെട്രേയിൽ മുഴുവൻ മെസ്സിമാരായിരുന്നു. എണ്ണിതിട്ടപ്പെടുത്താൻ പറ്റാത്തത്രയും. പല പ്രായത്തിലുള്ളവർ, ഏതൊക്കെയോ നാട്ടുകാർ, ഏവരുടെയും കുപ്പായത്തിന്റെ പിന്നിൽ മെസ്സി എന്നെഴുതിയിരുന്നു. പത്തെന്ന അക്കവും ഉണ്ടായിരുന്നു.

യാത്രയ്ക്കിടെ സുഹൃത്ത് സുഹൈലിനോടും കുടുംബത്തോടും അടുത്തു നിൽക്കുന്ന അർജന്റീനക്കാരൻ ചോദിച്ചു. നിങ്ങളുടെ അടുത്ത് ഇന്നത്തെ കളിക്കുള്ള ടിക്കറ്റ് ഉണ്ടോ? ഉണ്ട്.

നിങ്ങൾ എത്രരൂപയ്ക്കാണ് വാങ്ങിയത്.?

40 റിയാൽ (906.82 ഇന്ത്യൻ രൂപ)- സുഹൈൽ മറുപടി പറഞ്ഞു.