മറക്കില്ല മൊറോക്കോയെ

ഖത്തർ ലോകകപ്പിൽ നിറഞ്ഞാടിയ മൊറോക്കോ എന്ന അറ്റ്ലസ് സിംഹങ്ങൾ വടക്കൻ ആഫ്രിക്കയുടെ വന്യതയും യൂറോപ്യൻ ഫുട്ബോളിന്റെ സിലബസുമായി കളിക്കുന്നത്തോഹരമായ കാഴ്ചയായിരുന്നു

-  എം.പി. സുരേന്ദ്രൻ

ഈ ലോകകപ്പിൽ അട്ടിമറിക്ക് കെൽപ്പുള്ള ടീമാണ് മൊറോക്കോയെന്ന് ഈ ലേഖകൻ നേരത്തെ എഴുതിയിരുന്നു. അവർക്ക് മികവുറ്റ ഫുട്ബോൾ പാരമ്പര്യമുണ്ട്. കേരളത്തെപ്പോലെ മൂന്നരക്കോടി ജനങ്ങളുള്ള നാട്, ചരിത്രസഞ്ചാരിയായ ഇബിനുബത്തൂത്തയുടെ ജന്മഭൂമിയാണ്. അവരുടെ ഫുട്ബാൾ സംസ്കാരം പോലും പല നാടുകളിൽനിന്ന് പല ശൈലിയിൽ നിന്ന് രൂപംകൊണ്ടതാണ്. അവരുടെ സിംഹഹൃദയമുള്ള പരിശീലകൻ ഖാദിദ് ഗാഗുയി ചരിത്രം രചിക്കാൻ ടീമിനെ ഒരുക്കുകയും ചരിത്രത്തെ സ്മരിക്കുകയും ചെയ്തു. അവരുടെ സുൽത്താൻ മുഹമ്മദ് ആറാമൻ, കടുത്ത ഫുട്ബോൾ പ്രേമിയാണ്.

1986ൽ മൊറോക്കോ, ലോകകപ്പിന് എത്തിയത് മുഹമ്മദ് തിമൗമി എന്ന ആഫ്രിക്കൻ ഫുട്ബോൾ ഇതി ഹാസവുമായാണ്. അവരുടെ ഗ്രൂപ്പിലായിരുന്നു ഇംഗ്ലണ്ടും പോർച്ചുഗലും പോളണ്ടും. അന്ന് പോർച്ചുഗലിനെ അവർ 3-1ന് തോല്പിച്ചു. ഇംഗ്ലണ്ടും പോളണ്ടുമായി സമനില പിടിച്ച് പ്രീ ക്വാർട്ടറിലേക്ക് കടന്നു. ജോസ് ഫാരിയ എന്ന ബ്രസീലി യൻ പരിശീലകനാണ് അവരെ അവിടെയെത്തിച്ചത്. പ്രീക്വാർ ട്ടറിൽ കടക്കുന്ന ആദ്യത്തെ ആഫ്രിക്കൻ രാഷ്ട്രമായിരുന്നു മൊറോക്കോ. പ്രീക്വാർട്ടറിൽ മത്തേവൂസിന്റെ ഒരൊറ്റ ഗോളിന് അവർ ജർമനിയോട് അടിയറവ് പറഞ്ഞു. 2018ൽ അവർ ക്രി സ്റ്റ്യാനോ റൊണാൾഡോയുടെ ഒരു ഗോളിന്റെ പിൻബലത്തിൽ പോർച്ചുഗലിനോട് അടിയറവ് പറയുകയായിരുന്നു.

ഈ ചരിത്രം ഇപ്പോൾ ഓർമിച്ചത് ഈ ക്വാർട്ടർ ഫൈനലിലെ അവരുടെ മുന്നേറ്റം, അപ്രതീക്ഷിതമായിരുന്നില്ല എന്നു സൂചിപ്പിക്കാനാണ്. ക്രിസ്റ്റ്യാനോയുടെ ഒരു അളന്നുമുറിച്ച മിന്നൽ പാസിൽ നി ന്ന് ജാവോഫെലിക്സ് പായിച്ച ഒരു കിടിലൻ ഷോട്ട്, ഗോളി ബോനു കുത്തിയകറ്റിയ നിമിഷം മൊറോക്കോ ചരിത്രത്തിലേക്ക് കടന്നു. അതുവരെ ഒരാഫ്രിക്കൻ ഗോൾകീപ്പറും മൂന്ന് ക്ലീൻ ഷീറ്റുകൾ ലോകകപ്പിൽ നേടിയിരുന്നില്ല.