பப்பா... மம்மா... குக்கூ!

மும்பை சத்ரபதி சிவாஜி இன்டர்நேஷனல் விமான நிலையத்திலிருந்து புறப்பட்ட இண்டிகோ விமானம் சென்னை விமான நிலையத்தை நோக்கி பறந்து வந்து கொண்டிருந்தது..

- வெ.இராம்குமார்

விண்ணில் மேகக் கூட்டங்களுக்குள் காற்றைக் கிழித்துக் கொண்டு வேகமாக சென்ற விமானமானது, வாழ்க்கையில் வரும் இன்னல்களையும், தடைகளையும் உடைத்துக் கொண்டு முன்னேறு எனும் அரிய வாழ்க்கை தத்துவத்தை சொல்லாமல் சொல்லிக் கொண்டிருந்தது.வானுக்கு பெரும்புள்ளியாக காட்சியளித்த விமானம் ஏனோ, பூலோக மனிதர்களுக்கு சின்னஞ் சிறு புள்ளியாகவே தெரிகிறது. சில நேரங்களில் பிரபலமான மனிதர்களும், உயரத்தில் இருப்பவர்களுக்கு பிரமாண்டமாக தெரிந்தாலும், கீழேயிருந்து அண்ணாந்து பார்ப்பவர்களுக்கு கண்ணுக்கு முழுமையாக புலப்படாத விமானம் போலவே புரியாத புதிராக காட்சியளிக்கிறார்கள்.. ஒரு விதத்தில் விமானமும் மனிதர்களும் ஒன்றுதான்;தாங்கள் சேர வேண்டிய இடம் வந்ததும், இறங்கியவுடன் பத்திரமாக கரை சேர்த்த விமானத்தை திரும்பி கூட பார்ப்பதில்லை;உதவி செய்யும் நல்லவர்களை தன் தேவைக்கு உபயோகித்துவிட்டு, தேவை தீர்ந்ததும், திரும்பிக் கூட பார்ப்பதில்லை, சுயநல மனிதர்கள்..