ஆச்சர்யம் தரும் திரையுலகம்!

மலையாளம் தெலுங்கு, கன்னடம் என பல மொழிகளில் நடித்து வரும் அனுபமா பரமேஸ்வரன், நேரம் கிடைக்கும் போது தமிழில் தலை காட்டி வருகிறார். 

- திருமகன்

டாப் ஹீரோயின் பட்டியலில் இடம் பெறவில்லை என்றாலும் திரை உலகில் எப்படி நடந்து கொள்ள வேண்டும் என்ற தொழில் நுணுக்கங்களை தெரிந்து வைத்திருக்கும் அனுபமா பரமேஸ்வரன் அந்த அனுபவங்களை மனம் விட்டு பகிர்ந்து கொள்கிறார்.

உங்களை நடிக்கத் தூண்டியது எது ?

நான் நடுத்தரக் குடும்பத்தைச் சேர்ந்த பெண். நடிப்பு என்பது எனக்கு நினைத்துப் பார்க்க முடியாத ஒன்றாக இருந்தது. ஆனால் நான் நடிகையாக வேண்டும் என்ற யோசனை எப்போது தொடங்கியது என்று எனக்குத் தெரியவில்லை. நான் படம் பார்க்கும் போதெல்லாம், ஒரு நடிகர் அந்த கதாபாத்திரமாகவே எப்படி மாறுகிறார் என்று என் உள்ளுணர்வு ஆச்சரியப்படும்.

'பிரேமம்' ஆடிஷனுக்கு போகப்போகிறேன் என்று வீட்டில் சொன்ன போது, இரண்டு நாட்கள் என் பெற்றோர் என்னை திட்டித்தீர்த்தனர். ஆனால் அதற்குப் பிறகு என் விருப்பத்துக்கு ஆதரவு தெரிவித்தனர். இப்போது என் அம்மா அடிக்கடி என்னுடன் படப்பிடிப்புகளுக்கு துணையாக வருகிறார்..

நீங்கள் நடித்ததில் உங்களுக்கு பிடித்த படம் எது?

நடிகைகளை பொறுத்தவரையில் அவர்கள் நடித்த முதல் படத்துடன் அவர்களுக்கு எப்போதுமே தனித் தொடர்பு உண்டு. அப்படித்தான் என் இதயத்தில் எப்போதும் என் முதல் படம் 'பிரேமம்' மீதான அன்பு இருக்கிறது. மற்றபடி நான் நடித்த அனைத்து வேடங்களும் மிகவும் வித்தியாசமானவையாக இருப்பதாக உணர்கிறேன்.