തൃപ്പൂണിത്തുറ കോവിലകത്ത വലിയമ്മ തമ്പുരാനും ഓർമ്മയിലെ അത്തച്ചമയവും

തൃപ്പൂണിത്തുറ കോവിലകത്തെ ഏറ്റവും പ്രായം കൂടിയ സ്ത്രീ മൃണാളിനി തമ്പുരാനാണ്. വയസ്സ് അധികമൊന്നും ആയില്ല.96.

- പി ജെ

കേരളത്തിലെ മറ്റ് കോവിലകങ്ങളിൽ നിന്ന് വ്യത്യസ്തമായി തൃപ്പൂണിത്തുറ കോവിലകത്തിന് ഒരു പ്രത്യേകതയുണ്ട്. അതായത്, ഇവിടെ തമ്പുരാട്ടിമാരില്ല. തമ്പുരാന്മാരേയുള്ളൂ. എന്നുപറഞ്ഞാൽ കോവിലകത്ത് സ്ത്രീകളില്ല. പുരുഷന്മാരേയുള്ളു എന്നല്ല അർത്ഥം. സ്ത്രീകളായാലും പുരുഷന്മാരായാലും സംബോധന അങ്ങനെയാണെന്നുമാത്രം. തെളിച്ചുപറഞ്ഞാൽ, കോവിലകത്തെ ഏറ്റവും പ്രായം കൂടിയ വ്യക്തി പുരുഷനാണെങ്കിൽ വലിയ തമ്പുരാൻ എന്നും, സ്ത്രീയാണെങ്കിൽ വലിയ അമ്മ തമ്പുരാൻ എന്നും അറിയപ്പെടും. താഴോട്ടുള്ളവർ പേരിനൊപ്പം തമ്പുരാൻ ചേർത്തും അറിയപ്പെടും.

തൃപ്പൂണിത്തുറ ചന്ദ്രവിലാസം പാലസിൽ മൃണാളിനി തമ്പുരാൻ ഇപ്പോൾ വലിയ അമ്മ തമ്പുരാനായി മാറിയിട്ടുള്ളത് അങ്ങനെയാണ്. തൃപ്പൂണിത്തുറ കോവിലകത്തെ ഏറ്റവും പ്രായം കൂടിയ സ്ത്രീ മൃണാളിനി തമ്പുരാനാണ്. വയസ്സ് അധികമൊന്നും ആയില്ല.96. എന്നുകരുതി, കേൾവിക്ക് അൽപ്പമൊരു ബുദ്ധിമുട്ടുണ്ടെന്നതൊഴിച്ചാൽ മറ്റ് പറയത്തക്ക ആരോഗ്യ പ്രശ്നങ്ങളൊന്നുമില്ല. ഓർമ്മയ്ക്കാണെങ്കിൽ നല്ലതെളിച്ചവും രാജഭരണ കാലത്തെക്കുറിച്ചൊക്കെ പറയുമ്പോൾ; പ്രത്യേകിച്ചും. "മഹിളാരത്നം' വായനക്കാരുമായി പഴയകാലത്തെ ഓർമ്മകൾ പങ്കുവയ്ക്കാനും, അത്തച്ചമയ വിശേഷങ്ങൾ പറഞ്ഞുതരുവാനും വേണ്ടി തൊണ്ണൂറ്റി ആറുകാരിയായ വലിയ അമ്മ തമ്പുരാനെ കാണുവാൻ, അമ്മ തമ്പുരാന്റെ ബന്ധു ശിവദാസൻ തമ്പുരാനുമായി ചന്ദ്രവിലാസം പാലസിലെത്തിയത്, ഓർമ്മയുടെ ആ തെളിച്ചം കേട്ടറിഞ്ഞിട്ടു കൂടിയാണ്.

തീയന്നൂർ നമ്പൂതിരിക്കും കുഞ്ഞിക്കാവ് തമ്പുരാനും മക്കൾ നാലുപേരായിരുന്നു. മൂന്ന് പെണ്ണും ഒരാണും. അതിൽ മൂന്നാമത്തെ പെൺസന്തതിയാണ് മൃണാളിനി തമ്പുരാൻ എന്ന വലിയ അമ്മ തമ്പുരാൻ. ആ നാല് മക്കളിൽ ഈ വലിയമ്മ തമ്പുരാൻ മാത്രമേ ഇപ്പോൾ ജീവിച്ചിരിപ്പുള്ളൂ.

കോവിലകം വക സ്കൂളിലായിരുന്നു 12 വരെയുള്ള പഠനം. പിന്നെ മഹാരാജാസ് കോളേജിൽ പഠിക്കാൻ പോയി. അവിടുന്ന് എക്കണോമിക്സ് എടുത്ത് ബി.എ പാസ്സായി. അതിനിടെ പാരമ്പര്യവുമായുള്ള സംഗീതഭ്രമം കലശലായപ്പോൾ മദ്രാസിലെ സെൻട്രൽ സ്കൂൾ ഓഫ് മ്യൂസിക്സിൽ ചേർന്ന് സംഗീതവിദ്വാൻ കോഴ്സും പാസ്സായി. തുടർന്ന് കൽക്കട്ട, മുംബയ്,ജർ, ദൽഹി എന്നിവിടങ്ങളി ലൊക്കെപ്പോയി പാടുവാനുള്ള അവസരം മൃണാളിനി തമ്പുരാന് ലഭിച്ചിരുന്നു.