സ്നേഹവും സന്ദേശവും കൈമാറുന്ന ഒരു സുദിനം

ഇന്ന് കുടുംബാംഗങ്ങൾ ഒത്തുചേരുന്ന ഒരവസരം കൂടിയാണ് ക്രിസ്തുമസ് കാലം.

ഡിസംബർ 25.

എല്ലാ മനുഷ്യരുടേയും പാപങ്ങൾ മോചിച്ച് അവരെ രക്ഷിക്കുവാൻ ദൈവ പുത്രൻ മനുഷ്യനായി പിറന്ന ദിനത്തിന്റെ ഓർമ്മയ്ക്ക് വിശുദ്ധിയുടെ പുണ്യവുമായി വീണ്ടുമൊരു ക്രിസ്തമസ് കാലം കൂടി വന്നെത്തുകയായി...

സ്നേഹവും സന്ദേശവും കൈമാറി ക്കൊണ്ട് കോട്ടയത്തെ രണ്ട് പ്രമുഖ ചലചിത്ര പ്രവർത്തകർ ഇന്നിവിടെ ഒത്തുകൂടിയത് ക്രിസ്തുമസ് കാലത്തെ ഓർമ്മകളുമായിട്ടാണ്.

സിനിമാ നിർമ്മാതാവ് ജോയ് തോമസും സംവിധായകൻ ജോഷി മാത്യുവും.

ജൂബിലി പിക്ച്ചേഴ്സിന്റെ ബാനറിൽ നിരവധി സിനിമകൾ നിർമ്മിച്ചിട്ടുള്ള ജോയ് തോമസ് കോട്ടയത്ത്  കളത്തിൽപ്പടിയിലാണ്  താമസിക്കുന്നത്. ജോയ് തോമസിന്റെ വസതിയിലേക്ക് ജോഷിമാത്യുവും ഭാര്യ മോളിയും എത്തിച്ചേർന്നത് സ്നേഹസമ്മാനവുമായിട്ടാണ്.

സിനിമയുമായി ബന്ധപ്പെട്ട കോട്ടയത്തെ ഏതൊരു പരിപാടിയിലും മിക്കവാറും ഇവർ രണ്ടുപേരുടെയും സാന്നിധ്യമുണ്ടാകാറുണ്ട്. വർഷങ്ങൾക്ക് മുൻപ് കോട്ടയത്ത് ഡിന്നി ഫിലിംസ് എന്ന വിതരണക്കമ്പനിയുടെ മാനേജരായിരുന്നു ജോയ് തോമസ്. അക്കാലം മുതലെ ഞങ്ങൾ തമ്മിൽ പരിചിതരായിരുന്നുവെന്ന് ജോഷി മാത്യു പറഞ്ഞു.

 കോട്ടയത്തെ കലാ-സാംസ്ക്കാരിക പരിപാടികളിലും ഫിലിം ഫെസ്റ്റിവലിനും മറ്റ് സിനിമാ ചടങ്ങുകളിലുമൊക്കെ ഞങ്ങളുടെ സാന്നിദ്ധ്യമുണ്ടാകും. സിനിമാ ബന്ധങ്ങൾക്കുപരി കുടുംബബന്ധങ്ങളായി. പിന്നീട് ഞങ്ങളുടെ രണ്ടുപേരുടെയും മക്കൾ ഒരുമിച്ച് ഒരു സ്കൂളിലായിരുന്നു പഠനം. അങ്ങനെ കുട്ടികൾ തമ്മിലും അടുപ്പമായി.- ജോഷിമാത്യു പറഞ്ഞു.

ക്രിസ്തുമസ്സിന്റെ അനുഭവങ്ങൾ ധാരാളമുണ്ട്. ചെറുപ്പകാലങ്ങളിലെ അനുഭവങ്ങളാണ് ഏറെയും മനസ്സിലുള്ളത്. രാത്രിയിൽ പള്ളിയിൽ പോകും, പാതിരാകുർബാനയിൽ പങ്കെടുക്കും. പിറവി ആഘോഷിക്കും. തലേദിവസം രാത്രിയിൽ കമ്പിത്തിരി കത്തിക്കുക, പടക്കം പൊട്ടിക്കുക, ക്രിസ്തുമസ് ദിനം അടുക്കുമ്പോഴേക്കും ക്രിസ്തുമസ് ഒരുക്കുക, സ്റ്റാർ തൂക്കിയിടുക. തുടങ്ങിയതെല്ലാം പണ്ടു ചെയ്തിരുന്നു.