എളിമയുടെ പൂനിലാവ്

ഈ വരുന്ന ക്രിസ്തുമസ് കാലത്ത് ആ പഴയ അനുഭവകഥ വിവരിക്കുകയാണ് ചാലി പാലാ.

- ജി.കൃഷ്ണൻ

64 വർഷങ്ങൾക്ക് മുൻപുള്ള ഒരു ക്രിസ്തുമസ് രാവ്. മഞ്ഞും തണുപ്പും നിറഞ്ഞുനിൽക്കുന്നു. എല്ലാവർക്കും ആ രാവ് നിറമുള്ളതായിരുന്നു. എന്നാൽ, ഒരു കുടുംബത്തിന് ആ രാത്രി കറുത്ത ദിനമായി മാറി.

അന്ന് പത്തുവയസ്സുമാത്രം പ്രായമുണ്ടായിരുന്ന ഒരു ബാലന്റെ മനസ്സിൽ ആളിക്കത്തിയ തീ ഇന്നും എരിഞ്ഞടങ്ങാതെ നിറഞ്ഞുനിൽക്കുന്നു. ഇന്ന് 64 വർഷങ്ങൾ കഴിഞ്ഞിട്ടും ക്രിസ്തുമസ് കാലം വരുമ്പോൾ അനുഭവങ്ങളുടെ നെരിപ്പോടുകളാണ്, വിങ്ങലുകളാണ് മനസ്സുനിറയെ.

ആ വേദന കടിച്ചമർത്തുന്ന ബാലനെ നമ്മളറിയും. പാലാക്കാരൻ ചാലി. സിനിമാക്കാരും പ്രേക്ഷകരും ചാലി പാലാ എന്നുവിളിക്കുന്ന ആ ചലച്ചിത്രനടനാണ് ആ ബാലൻ.

ഈ വരുന്ന ക്രിസ്തുമസ് കാലത്ത് ആ പഴയ അനുഭവകഥ വിവരിക്കുകയാണ് ചാലി പാലാ.

പാലായിലെ കിഴതടിയൂരുള്ള കത്തീഡ്രൽ ചർച്ചിൽ ഞങ്ങൾ വീട്ടിൽ നിന്നും പ്രാർത്ഥനയ്ക്കായി പോയി. അമ്മയും എന്റെ സഹോദരിമാരും ഒരുമിച്ചായിരുന്നു പള്ളിയിൽ പോയത്. അപ്പനും എട്ടുവയസ്സുള്ള എന്റെ കുഞ്ഞനുജനും അന്ന് വീട്ടിലുണ്ടായിരുന്നു.

രാത്രിയിൽ 12 മണിക്കാണ് കുർബ്ബാന തുടങ്ങുന്നത്. വെളുപ്പിന് മൂന്നുമണിവരെ കാണും. ഉണ്ണി ഈശോയെ തീ കായ്ക്കുന്ന ചടങ്ങുമൊക്കെ അന്നുണ്ട്. ഈ കുർബ്ബാന നടക്കുന്നതിനിടയിൽ പള്ളിമുറ്റത്ത് നിന്നുകൊണ്ട് ഒരു കാഴ്ച കണ്ടു. തീ ആളിക്കത്തുന്ന കാഴ്ച. കുറച്ച് ഉയർന്ന പ്രദേശമായ കവിക്കുന്ന് എന്ന സ്ഥലത്തൊരു പള്ളിയുണ്ട്. അവിടെ ഉണ്ണിയേശുവിനെ തീ കായ്ക്കുന്ന ചടങ്ങാണ് നടക്കുന്നതെന്നാണ് ഞങ്ങളെല്ലാം ആദ്യം കരുതിയത്. പക്ഷേ, അതായിരുന്നില്ല. ഞങ്ങളുടെ ഓല മേഞ്ഞ വീട് കത്തിയെരിയുന്ന കാഴ്ചയായിരുന്നു അത്. കുറച്ചുകഴിഞ്ഞാണ് ഞങ്ങളെല്ലാവരും അത് മനസ്സിലാക്കു ന്നത്. അമ്മ അതുകണ്ടതും ബോധം കെട്ടുവീണു. വീട് കത്തിപ്പോകുന്നതിന്റെ ആധി മാത്രമായിരുന്നില്ല അമ്മയ്ക്ക്. എന്റെ അപ്പൻ വീട്ടിലുണ്ട്. ഇളയ അനുജൻ രാജ തൊട്ടിലിൽ കിടന്നുറങ്ങുന്നുണ്ടായിരുന്നു.