അദ്ധ്യയനവർഷം ആരംഭിക്കുന്നു ശ്രദ്ധിക്കുക

പുതിയൊരു അദ്ധ്യയനവർഷം ആരംഭിക്കുകയായി. കുട്ടികൾ സ്കൂളിൽ പോകുമ്പോൾ അവരുടെ കാര്യത്തിൽ അമ്മമാർ ഇനി എന്തെല്ലാം ശ്രദ്ധിക്കേണ്ടിയിരിക്കുന്നു?

- സുമാമാക്സിമിൻ 9446485221

പുതിയൊരു അദ്ധ്യയനവർഷം ആരംഭിക്കുകയായി. കുട്ടികൾ സ്കൂളിൽ പോകുമ്പോൾ അവരുടെ കാര്യത്തിൽ അമ്മമാർ ഇനി എന്തെല്ലാം ശ്രദ്ധിക്കേണ്ടിയിരിക്കുന്നു? സത്യത്തിൽ സ്ക്കൂൾ തുറക്കുമ്പോൾ കുട്ടികളെപ്പോലെ അമ്മമാർക്കും ടെൻഷൻ ഒട്ടും കുറവല്ല. ശ്രദ്ധിക്കാൻ ഒട്ടേറെ കാര്യങ്ങൾ. യൂണിഫോം മുതൽ കുട വരെ സംഘടിപ്പിക്കണം. ലഞ്ച് ബോക്സ്, അവർക്ക് വേണ്ടുന്ന ഭക്ഷണങ്ങൾ ഇങ്ങനെ പലതാണ്. തന്റെ മോൻ അല്ലെങ്കിൽ മോൾ മറ്റുള്ള കുട്ടികളെക്കാൾ പഠനത്തിലും ആരോഗ്യത്തിലും മുൻപന്തിയിലായിരിക്കണമെന്നാണ് ഏതൊരു അമ്മയുടെയും ആഗ്രഹം. അതിനായി എന്ത് ചെയ്യാനും അവർ തയ്യാറാണു താനും. കുട്ടികൾക്ക് ലഞ്ച്ബോക്സ് ഒരുക്കുമ്പോഴും മറ്റു സമയങ്ങളിലെ ആഹാരത്തിന്റെ കാര്യത്തിലും അമ്മമാർ ഏറെ ശ്രദ്ധ ചെലുത്തേണ്ടതുണ്ട്.

ലഞ്ച് ബോക്സിൽ കൽക്കണ്ടംകൊണ്ടുള്ള ചോറ്, വെർമ്മലി, റവ ഇഡ്ഡലി, റൊട്ടി ഉപ്പു മാവ്, ബ്രഡ്, ഏത്തയ്ക്ക്, സാൻവിച്ച്, അവൽ ഉപ്പു മാവ്, ബ്രഡ് ബജിയ, ന്യൂഡിൽസ്, സൊൻ ദോശ, സ്പ്രിംഗ്റോൾ, ഊത്തപ്പം ഒക്കെ കുട്ടികൾ ഇഷ്ടപ്പെടുന്ന വിഭവങ്ങളാണ്.

പഠിക്കുന്ന കുട്ടികളുടെ ആരോഗ്യത്തിനും ബുദ്ധിക്കും ആഹാരത്തിന്റെ പ്രാധാന്യം ഏറെയാണ്. കുട്ടികളുടെ ആഹാരത്തിൽ ഏറ്റവും പ്രധാനം പ്രഭാതഭക്ഷണമാണ്. തലച്ചോറിന്റെ ഭക്ഷണമെന്നാണ് ഇതിനെ വിശേഷിപ്പിക്കുന്നത്.