ഇതാ, വെഞ്ഞാറമൂടിന്റെ വീഥിയിലൂടെ

വെഞ്ഞാറമൂടിന്റെ ഹൃദയത്തിലൂടെ സുരാജിനും സുഹൃത്തുക്കൾക്കുമൊപ്പം വിശേഷങ്ങൾ പങ്കുവച്ചൊരു ദിനം

- വി. ആർ. ജ്യോതിഷ്

വെഞ്ഞാറമൂടിൽ, റോഡിൽ തിരക്ക് കുറഞ്ഞ ഭാഗത്ത് കാർ നിർത്തി. ഫോട്ടോയെടുക്കാനുള്ള ഒരുക്കമാണ്. കാറിൽ നിന്ന് സുരാജ് പുറത്തേക്കിറങ്ങിയതും വിളി വന്നു. "ടേ..... കുട്ടാ, എന്തര് ഫോട്ടോയെടുക്കാ...

"തള്ളേ, ഇതാര് ടേ, എന്ത് വിശേഷങ്ങള് അണ്ണനിപ്പോ എവിടെയ്, എങ്ങനെയൊണ്ട് കച്ചോടങ്ങള്...

"ഓ എന്തര് പറയാൻ പച്ചപിടിച്ച് വരണ് കുട്ടാ. ഇവിടെന്തര് പരിപാടി "ഇവര് വനിത മാസികേന്ന്... ഫോട്ടോയെടുപ്പ് ആ സംഭാഷണം അങ്ങനെയങ്ങനെ നീണ്ടുനീണ്ടുപോയി.

ഇതേ സമയം അങ്ങ് അമേരിക്കയിലും സുരാജ് വെഞ്ഞാറമൂടാണ് ചർച്ചാ വിഷയം. നാഷനൽ ബാസ്കറ്റ് ബോൾ അസോസിയേഷൻ (എൻബിഎ) വേദി. അതിന്റെ വിശേഷങ്ങൾ എറ്റവും നന്നായി വിലയിരുത്തുന്ന ജനപ്രിയ പരിപാടിയാണ് "ഇൻസൈഡ് എൻ.ബി.എ.' ഏർണീ ജോൺസൺ, കെന്നി സ്മിത്ത്, ചാൾസ് ബാർക്ലീ പോലെയുള്ള പ്രമുഖരാണ് പരിപാടിയുടെ അവതാരകർ. മീമുകളുടെ അകമ്പടിയോടെയാണ് അവരുടെ കളിവിശകലനം.

ലോക പ്രശസ്ത ബാസ്കറ്റ് ബോൾ താരം ചാൾസ് ബേബിയുടെ കളിയെക്കുറിച്ചുള്ള പ്രവചനം തെറ്റി. അതേക്കുറിച്ച് ആയിരക്കണക്കിന് മീമുകൾ ഇറങ്ങി. പക്ഷേ, അതിൽ ദശമൂലം ദാമുവിന്റെ പരാക്രമങ്ങൾ വെള്ളം ചേർക്കാതെ മിക്സ് ചെയ്ത മീം ഹിറ്റായി. അമേരിക്കൻ മലയാളി പോസ്റ്റ് ചെയ്ത മീമിലൂടെ ദാമു കളിവിശകലനത്തിനൊപ്പമുള്ള മീം ആയി തിരഞ്ഞെടുക്കപ്പെട്ടു. പക്ഷേ, വെഞ്ഞാറമൂടിൽ നിൽക്കുന്ന ഈ കുട്ടന് ഇതൊന്നും അറിഞ്ഞ ഭാവമേയില്ല.

വനിതയ്ക്ക് വേണ്ടി വെഞ്ഞാറമൂട് വിശേഷങ്ങൾ പങ്കു വയ്ക്കാൻ സുഹൃത്തുക്കൾക്കൊപ്പം കൂടാനെത്തിയതാ സുരാജ്. ആലന്തറ രംഗപ്രഭാതാണ് സൗഹൃദസംഗമ വേദി. സുരാജിന്റെ ജ്യേഷ്ഠൻ സജിയാണ് പ്രോഗ്രാമിന്റെ സംഘാടകൻ. അവിടേക്കുള്ള കാർ യാത്രയ്ക്കിടെ സുരാജ് പഴയ വിശേഷങ്ങൾ പറഞ്ഞു.

അമ്മയിൽ നിന്നു കിട്ടിയ മിമിക്രി