വീര്യം കൂടുന്ന വീഞ്ഞ്

'സ്ഫടികം' വീണ്ടും തിയറ്ററിലെത്തുമ്പോൾ സംവിധായകൻ ഭദ്രൻ സംസാരിക്കുന്നു'സ്ഫടികം' വീണ്ടും തിയറ്ററിലെത്തുമ്പോൾ സംവിധായകൻ ഭദ്രൻ സംസാരിക്കുന്നു

- വിജീഷ് ഗോപിനാഥ്

സിനിമയുടെ ഭൂപടത്തിൽ സ്ഥടികം' റീ റിലീസ് എങ്ങനെയാണ് അടയാളപ്പെടുത്തുക ? 
അഡ്വ. മഹിമ മഹാദേവ്, കോട്ടയം

കണ്ടു കണ്ടു മലയാളികൾ കരണ്ടുതീർന്ന സിനിമയല്ല സ്ഫടികം. ഇപ്പോഴും കണ്ടുകൊണ്ടേയിരിക്കുന്ന, കാണാനാഗ്രഹിക്കുന്ന ഒന്നാണ്. പുതിയ തലമുറ വലിയ സ്ക്രീനിൽ ഈ സിനിമ കണ്ടിട്ടില്ല. പുതിയ സ്ഫടിക'ത്തിൽ പുത്തൻ സാങ്കേതിക വിദ്യയിലൂടെ ശബ്ദവും കാഴ്ചയും മറ്റൊരു തലത്തിലേക്കു മാറിയിട്ടുണ്ട്. അതു കൊണ്ടു തന്നെ ഇതൊരു അടയാളപ്പെടുത്തലാകണമേ എന്നാണ് എന്റെ ആഗ്രഹം

ഒരു പ്രത്യേക കാലത്ത് സംഭവിച്ച സിനിമയാണു സ്ഫടികം. മനുഷ്യ മനസ്സിനകത്തു തോമ അനുഭവിക്കുന്ന സംഘർഷങ്ങൾ എന്നുമുണ്ട്. അതുകൊണ്ടാണു സ്ഫടികം' കുടുംബങ്ങളുടെ വികാരമായി മാറിയത്. എന്റെ മറ്റൊരു സിനിമയും ഞാൻ റീ റിലീസ് ചെയ്യില്ല.

ഇന്നാണ് സ്ഫടികം ചെയ്യുന്നതെങ്കിൽ ആരായിരിക്കും ആടുതോമ ? അഡ്മിൻ ബക്കർ, ഇഷാ ഹോളിഡേയ്സ്, കൊച്ചി

ഈ കടൽ നീന്തി കടക്കാൻ ആർക്കു ശേഷിയുണ്ട് എന്നു ചോദിക്കുന്നതു പോലെയാണത്. അങ്ങനെയൊരാൾ ഇനി ഉണ്ടാകുമോ എന്നും അറിയില്ല. സംഭവിക്കേണ്ട കാലത്ത് അതു സംഭവിച്ചു. ആ ചിന്തയ്ക്ക് ഇന്നു പ്രസക്തിയില്ല. അതിൽ വന്നു ചേരാനുള്ള നടീനടന്മാർ അന്നുണ്ടായി.