ഇവിടെ കേൾക്കാം ദൈവ ശബ്ദം

പാലാ രൂപതയുടെ സഹായമെത്രാൻ പദവിയിൽ നിന്നു സന്യാസത്തിലേക്കു മാറിയ മുരിക്കൻ പിതാവിന്റെ ആശ്രമത്തിൽ ഒരു പകൽ

- വി. ആർ. ജ്യോതിഷ്

പാഞ്ചാലിമേട്ടിൽ നിന്നു വീണ്ടും അഞ്ചു കിലോമീറ്റർ മല കയറണം തണ്ണിപ്പാറയിലെത്താൻ. കോടമഞ്ഞ് കാഴ്ച മറയ്ക്കുന്ന മലനിരകളാണു ചുറ്റും. തേയിലക്കാടുകൾക്കപ്പുറം വന്യമായ നിശബ്ദത, വല്ലപ്പോഴും കാഴ്ചയിൽ പെടുന്ന പ്രാർഥനാലയങ്ങൾ, വനങ്ങൾ അതിരിടുന്ന മലയിടുക്കുകൾ. ഇവിടെ എപ്പോഴും കാറ്റാണ്; പിന്നെ, തണുപ്പും. ചിലപ്പോഴതു മൃദുവായി തഴുകിപ്പോകും. മറ്റു ചിലപ്പോൾ വന്യ മൃഗങ്ങളെപ്പോലെ കടിച്ചു കുടയും.

ഈ മലഞ്ചെരുവുകളിലൊന്നിലാണു മാർ തോമസ് സ്ലീഹാ ദയറാ. പാലാ രൂപതയുടെ സഹായമെത്രാൻ പദവിയിൽ നിന്നു സന്യാസജീവിതത്തിലേക്കു മാറിയ ബിഷപ്പ് മാർ ജേക്കബ് മുരിക്കൻ ഏകാന്തജീവിതം നയിക്കുന്ന ഹെർമിറ്റ്, സിറോമലബാർ സഭയുടെ ചരിത്രത്തിൽ അത് ആദ്യത്തെ സംഭവമായിരുന്നു. ഒരു പിതാവ് തന്റെ സ്ഥാനമാനങ്ങളെല്ലാം ഇട്ടെറിഞ്ഞ് ഏകാന്തധ്യാനത്തിലേക്കു മടങ്ങുക. ആദിമമനുഷ്യനും ദൈവവും തമ്മിലുള്ള ബന്ധം എങ്ങനെയാണോ അതുപോലെയാണ് ഈ ഏകാന്തജീവിതവും.

പത്തു വർഷത്തോളം പാലാരൂപതയുടെ സഹായമെത്രാനായി സേവനം ചെയ്ത ശേഷമാണു മുരിക്കൻ പിതാവിന്റെ സ്ഥാനത്യാഗം. ബസിൽ സാധാരണക്കാരനായി യാത്ര ചെയ്തും തെരുവിൽ ജീവിക്കുന്നവരെ ശുശ്രഷിച്ചും ഒരു ചെറുപ്പക്കാരനു തന്റെ വൃക്കദാനം ചെയ്തും മുരിക്കൻ പിതാവ് സ്വന്തം ജീവിതത്തെ അത്രമേൽ ദൈവത്തിലേക്ക് അടുപ്പിച്ചിരുന്നു. ആളും അർത്ഥവുമുള്ള തിരക്കുപിടിച്ച മെത്രാൻ ജീവിതത്തിൽ നിന്നാണ് എല്ലാം ത്യജിച്ച സന്യസ്ത ജീവിതത്തിലേക്ക് അദ്ദേഹം മാറിയത്.