തുടക്കത്തിലേ മാറ്റാം മുഖക്കുരു

മുഖക്കുരു നിസ്സാരമെന്ന് കരുതല്ലേ. കാരണങ്ങളും ശാസ്ത്രീയ ചികിത്സാ മാർഗങ്ങളും അറിയാം

- അമ്മു ജൊവാസ്

കൗമാരത്തിൽ ഏറെ അലട്ടുന്ന പ്രശ്നങ്ങളുടെ പേരെഴുതാൻ പറഞ്ഞാൽ എല്ലാ ഉത്തരങ്ങളിലും മുഖക്കുരു ഉണ്ടാകും. കൗമാരത്തിന്റെ അടയാളമായാണ് മുഖക്കുരുക്കളെ കണ്ടിരുന്നതു പോലും.

പക്ഷേ, ചിലരിലിത് ആത്മവിശ്വാസത്തിൽ പാടുകൾ വീഴ്ത്തുന്ന പ്രശ്നമായി വളരാം. മുഖക്കുരു തന്നെ പല ഗ്രേഡുകളിലുണ്ട്. തുടക്കത്തിൽ ശ്രദ്ധിക്കാതിരുന്നാൽ മുഖത്തു പാടുകളും വടുക്കളുമായി സങ്കീർണ പ്രശ്നമായതു മാറും. അത്തരം സാഹചര്യം ഒഴിവാക്കാൻ മുഖക്കുരുവിന്റെ കാരണങ്ങളും ഗ്രേഡും ചികിത്സാരീതിയും മനസ്സിലാക്കാം.

എന്താണ് മുഖക്കുരു

ചർമത്തിന് എണ്ണമയം നൽകുന്ന സെബം' എന്ന സ്രവം ഉൽപാദിപ്പിക്കുന്ന ഗ്രന്ഥികളാണ് സെബേഷ്യസ് ഗ്രന്ഥികൾ. ഈ സ്രവം, രോമകൂപത്തോടു ചേർന്നുള്ള സുഷിരങ്ങൾ വഴി ചർമത്തിലെത്തുന്നു. ഈ സുഷിരങ്ങൾ അടഞ്ഞിരുന്നാൽ സെബം പുറത്താകാനാകാതെ ഉള്ളിൽ തന്നെ തങ്ങും. ഇതു പതിയെ വീർത്തു കുരുക്കളാകും.

മുഖത്ത് എണ്ണമയം അധികമായുള്ള നെറ്റി, കവിൾ, മൂക്കിന്റെ വശങ്ങൾ, താടി എന്നീ ഭാഗങ്ങളിലാണ് മുഖക്കുരു കൂടുതലായുണ്ടാകുന്നത്. മുഖത്തു മാത്രമല്ല, സെബേഷ്യസ് ഗ്രന്ഥികൾ അധികമുള്ള നെഞ്ച്, പുറം, തോളിനും കൈമുട്ടിനും ഇടയിലുള്ള ഭാഗം (അപ്പർ ആം) എന്നിവിടങ്ങളിലും ചിലർക്കു കുരുക്കൾ വരാറുണ്ട്.

മുഖക്കുരുവിനു ഗ്രേഡുണ്ട്

ഗ്രേഡ് ഒന്ന്: ആദ്യഘട്ടത്തിൽ വരുന്ന മുഖക്കുരു (comedones) രണ്ടു തരമുണ്ട്. ഒന്ന് ബ്ലാക്ക് ഹെഡ്സ് (Black heads) രണ്ടാമത്തേത് വൈറ്റ് ഹെഡ്സ് (white heads). കൂടാതെ ചെറിയ ചുവന്ന കുരുക്കളായ പാപ്യൂൾസും (papules) ഗ്രേഡ് ഒന്നിൽ പെടും.

ഗ്രേഡ് രണ്ട് : ഈ ഘട്ടത്തിൽ ഗ്രേഡ് ഒന്നിലുള്ളവപുറമേ പഴുപ്പു നിറഞ്ഞ ചെറിയ കുരുക്കളും (പൾസ്) ഉണ്ടാകും.

ഗ്രേഡ് മൂന്ന് : സിസ്റ്റുകൾ എന്നു വിളിക്കുന്ന വലിയ മുഖ ക്കുരുക്കൾ കൂടി ഗ്രേഡ് ഒന്ന്, രണ്ട് എന്നിവയ്ക്കൊപ്പം മുഖത്തു വന്നുതുടങ്ങും.

ഗ്രേഡ് നാല് : ഈ ഘട്ടത്തിൽ സിസ്റ്റുകളായിരിക്കും കൂടു തൽ. ഒപ്പം വലുപ്പം കൂടിയ നോഡുലോസിസ്റ്റിക് ആയും വരും.

മുഖക്കുരുക്കൾ ഗ്രേഡ് വണ്ണിൽ എത്തുമ്പോൾ തന്നെ ചികിത്സിച്ചാൽ അവ കൂടിയ ഗ്രേഡുകളിലേക്കു മാറാതിരിക്കും. മുഖക്കുരുവിൽ അണുബാധയുണ്ടാകുമ്പോഴാണ് അവ പഴുക്കാനും വേദനയുണ്ടാക്കാനും തുടങ്ങുന്നത്. ഇത്തരം മുഖക്കുരു ഉണങ്ങുമ്പോൾ പാടുകളും വടുക്കളും (scars) അവശേഷിക്കുകയും ചെയ്യും.