ഇന്ത്യ ചുറ്റി ഇരുവർ

കാറ്റും മഴയും വെയിലുമേറ്റ് ആക്ടീവ 3ജി സ്കൂട്ടറിൽ ഇന്ത്യ ചുറ്റിയ മേരിയും ജോയും

- തയാറാക്കിയത്: അഞ്ജലി അനിൽകുമാർ

രണ്ടുപെണ്ണുങ്ങൾ കൂട്ടുകൂടി യാത്ര പോയത് ലഡാക്കിലെ കരതുംഗ്ല മുതൽ കന്യാകുമാരി വരെ. മാനസികവും ശാരീരികവുമായ പ്രതിസന്ധികളെ കാറ്റിൽപ്പറത്തി കേരള റജിസ്ട്രേഷൻ ആക്ടീവ 3ജി സ്‌കൂട്ടറിൽ ഇരുവരും 48 ദിവസങ്ങൾക്കുള്ളിൽ സഞ്ചരിച്ചത് 5000 കിലോമീറ്റർ. മുപ്പതാം വയസ്സിലാണു തൃശ്ശൂർ ഈസ്റ്റ് ഫോർട്ട് സ്വദേശി മേരി ആന്റണിയും മൂന്നാർ കുഞ്ചിത്തണ്ണി സ്വദേശി ജോഷ്‌ന ഷാരോൺ ജോൺസണും യാത്ര ആരംഭിക്കുന്നത്

അച്ഛനും അമ്മയ്ക്കും മേരി നൽകിയ സമ്മാനമായിരുന്നു 2019ൽ നടത്തിയ നോർത്ത് ഇന്ത്യൻ ട്രിപ്. ആ യാത്രക്കിടയിലാണ് ലഡാക്കിലെ ട്രാവൽ കോർഡിനേറ്റർമാരായ ജോഷ്ണയും ഭർത്താവ് സുധീഷിനേയും പരിചയപ്പെടുന്നത്. യാത്രാ മുന്നൊരുക്കങ്ങളുടെ ഭാഗമായി മേരിയും ജോഷ്ണയും ഫോണിൽ സംസാരിച്ചു. സംസാരം സൗഹൃദമായി.

പക്ഷേ, മേരിയും കുടുംബവും ലഡാക്കിലെത്തുമ്പോൾ ജോഷ്നക്ക് അത്യാവശ്യമായി ഇടുക്കിയിലേക്ക് വരേണ്ടി വന്നു. നേരിൽ കണ്ടില്ലെങ്കിലും ഇരുവർക്കുമിടയിൽ ദൃഢമായ സൗഹൃദം വളർന്നു. ഒരുമിച്ചൊരു റോഡ് ട്രിപ് എന്ന ആശയത്തിലേക്കു മേരിയേയും ജോഷ്‌നയേയും എത്തിച്ചതും ഈ സൗഹൃദമാണ്. 2021 സെപ്റ്റംബർ 26നു കർതുംഗ്ലയിൽ നിന്ന് അവർ യാത്ര ആരംഭിച്ചു. നവംബർ രണ്ടിനു യാത്ര അവസാനിക്കുമ്പോൾ അവർ സ്വരൂക്കൂട്ടിയ അനുഭവങ്ങൾ അനവധിയാണ്.

നാടു കണ്ട് മനുഷ്യരെക്കണ്ട്...