തോൽവികൾ പഠിപ്പിച്ചത്

ആദ്യ രണ്ടു സംരംഭങ്ങളും പരാജയം. പക്ഷേ, മൂന്നാമങ്കത്തിൽ സൂപ്പർഹിറ്റായി മാറിയ അനൂജ ബഷീറിന്റെ സ്റ്റാർട്ടപ് വിജയകഥ

സംരംഭക എന്നതിനേക്കാൾ "ബിസിനസ് പോരാളി' എന്ന വിശേഷണമാകും കൊച്ചിക്കാരി അനൂജ ബഷീറിന് ചേരുക. 75 ലക്ഷം കടത്തിൽ നിന്നു കോടികളുടെ ആസ്തിയുള്ള ഫ്ലെക്സി ക്ലൗഡ് എന്ന കമ്പനിയിലേക്കുള്ള അനൂജയുടെ വളർച്ചയുടെയും വിജയത്തിന്റെയും കഥയാണിത്.

ഇ-കൊമേഴ്സും മറ്റു വ്യവസായങ്ങൾക്കും വേണ്ട ഹോസ്റ്റിങ്, ക്ലൗഡ് മാനേജ്മെന്റ് സേവ നങ്ങൾ ലഭ്യമാക്കുന്ന ഫ്ലെക്സി ക്ലൗഡ് എന്ന സ്റ്റാർട്ടപ്പിലേക്ക് ഇന്ത്യയിലെ പ്രമുഖ സ്ഥാപനങ്ങൾ കോടികളുടെ നിക്ഷേപമിറക്കിയതു വാർത്തയായിരുന്നു.

പക്ഷേ, വിജയത്തിളക്കത്തിൽ പുഞ്ചിരിക്കുമ്പോഴും അതിനു മുൻപ് നേരിട്ട പരാജയങ്ങളെക്കുറിച്ചു പറയാൻ അനൂജയ്ക്കു മടിയില്ല.

“വിജയിക്കാൻ ആദ്യം പഠിക്കേണ്ടത് "എന്തു കൊണ്ട് തോറ്റു?' എന്ന ചോദ്യത്തിനുള്ള ഉത്തരം കണ്ടുപിടിക്കലാണ്.''ആ അനുഭവങ്ങളാണ് "വേൾഡ് ഈസ് എ ബാൻഡ്' എന്ന പുസ്തകത്തിൽ അനുജ പങ്കുവയ്ക്കുന്നത്.

സ്വന്തം ബിസിനസ് എന്ന മോഹം

“കുസാറ്റിൽ നിന്നാണ് എംടെക് എടുത്തത്. അതിനു ശേഷം ടോക് എച്ച് എൻജിനീയറിങ് കോളജിൽ അധ്യാപികയും പ്ലേസ്മെന്റ് ഹെഡുമായി. പക്ഷേ, ഇതല്ല എന്റെ വഴിയെന്ന് തോന്നി. എൻജിനീയറിങ് വിദ്യാർഥികൾക്ക് ജോലി സാധ്യത കണ്ടെത്താനായി 'ഒറിയ' എന്ന സംരംഭം തുടങ്ങി. അതിന്റെ ഭാഗമായി ലൈക്സ് എന്ന “എംപ്ലോയബിലിറ്റി കരിക്കുലം' ആരംഭിച്ചു. വിദ്യാഭ്യാസമേഖലയിൽ അത്തരമൊരു പ്ലാറ്റ്ഫോം പുതുമയുള്ളതായിരുന്നു.