എൻജിനീയറിങ്ങിലെ ലോകാദ്ഭുതം

ലോകത്തിലെ ഏറ്റവും ഉയരം കൂടിയ ആർച്ച് റെയിൽവേ പാലമെന്ന റെക്കോർഡുമായി ജമ്മുവിലെ ചെനാബ് പാലം

- സുബിൻ ബാലൻ

എൻജിനീയറിങ്ങിലെ ലോകാദ്ഭുതമെന്നു വിശേഷിപ്പിക്കാം ജമ്മു കശ്മീരിലെ ചെനാബ് റെയിൽവേ മേൽപാലത്തെ. ലോകത്തിലെത്തന്നെ ഏറ്റവും ഉയരത്തിലുള്ള ഈ ആർച്ച് മേൽപാലത്തിലൂടെ ജൂൺ 20ന് ആദ്യമായി എട്ടു ബോഗികളുള്ള മെമു ട്രെയിൻ വിജയകരമായി പരീക്ഷണ ഓട്ടം നടത്തി. കശ്മീർ താഴ്വരയെ ഇന്ത്യയിലെ റെയിൽ ശൃംഖലയുമായി നേരിട്ടു ബന്ധിപ്പിക്കുന്ന തന്ത്രപ്രധാന ദൗത്യം കൂടിയുണ്ട് ചെനാബ് മേൽപാലത്തിന്.

ജൂൺ 20ന് ഉച്ചയ്ക്ക് 12.35ന് സംഗൽദാനിൽ നിന്നും ആരംഭിച്ച മെമു ട്രെയിനിന്റെ യാത്ര ഉച്ചയ്ക്ക് 2.05ന് രെസായിയിൽ പൂർത്തിയായപ്പോൾ ഇന്ത്യൻ റെയിൽവേക്ക് അത് അഭിമാന മുഹൂർത്തം കൂടിയായി. 46 കിമീ നീളത്തിലുള്ള വൈദ്യുതീകരിച്ച റെയിൽ പാതയിലൂടെയായിരുന്നു പരീക്ഷണ ഓട്ടം നടത്തിയത്. ശരാശരി വേഗത മണിക്കൂറിൽ 40 കിമി. ആകെ 40.787 കിമീ നീളത്തിലുള്ള ഒൻപതു തുരങ്കങ്ങളും ചെനാബ് മേൽപാലവും ഇതിനിടെ മെമു ട്രെയിൻ കടന്നു. രാജ്യത്തിനും ഇന്ത്യൻ റെയിൽവേക്കും അഭിമാനിക്കാവുന്ന ചെനാബ് മേൽപാലത്തിന് സവിശേഷതകളും നിരവധിയുണ്ട്.

ചെനാബ് പാലം