అల్లరి చిప్పీ

కొడీ ఆవుకి రెండు సంవత్సరాల దూడ ఉంది.

- డా.కె. రాణి

కొడీ ఆవుకి రెండు సంవత్సరాల దూడ ఉంది.పేరు చిప్పీ. అతడు చాలా అల్లరి చేసేవాడు, మొండివాడు. ఎవ్వరి మాట వినకుండా తనకు నచ్చినట్లు చేస్తుంటాడు. ప్రతి ఒక్కరు అతనిపై ఫిర్యాదు చేయడంతో కొడీ అతని గురించి చాలా ఆందోళన చెందేది. కొన్నిసార్లు అతని అల్లరి చేష్టల కారణంగా చిప్పీని కొట్టేవారు. తగిలిన దెబ్బలు అతని శరీరంపై ఎర్రని గుర్తులను మిగిల్చేవి.

ఒకసారి అతని గాయాలకు మందు రాస్తూ "బాబూ, నువ్వు నీతోపాటు ఇతరులకు ఇబ్బంది కలిగించే పని చేయకూడదు" అని వివరించింది తల్లి.

“అమ్మా, నీకు అడవి వాళ్ల గురించి తెలుసు కదా. వారు ఎప్పుడూ కథలు అల్లుతూ ఉంటారు.

ఎవరు తప్పు చేసినా నా పేరు చెబుతారు".

“అలా కాదు, అడవిలో వేరే జంతువులూ ఉన్నాయి. మరి వాటి గురించి ఎవరూ ఎందుకు చెప్పుకోరు కథలు. అందరూ నీ గురించే మాట్లాడుకుంటున్నారు”.

“అమ్మా వాళ్ల మాట వినకు. అందరు చెప్పినట్లుగా నేను లేను” అన్నాడు చిప్పీ.

“రేపటి నుంచి నువ్వు ఆహారం కోసం నాతో రావాలి. నీ తమ్ముడు గోల్డీ ఎప్పుడూ నాతోనే ఉంటాడు తెలుసా”.

“అమ్మా, అతడు ఇంకా చిన్నవాడు. అందుకే నీతో కంపెనీ అతనికి నచ్చింది. పెద్దవాడినయ్యాక నా ఆహారం నేనే ఏర్పాటు చేసుకోగలను. నాకు అడవిలో స్వేచ్ఛగా తిరగాలని ఉంది".

“స్వేచ్ఛ అంటే గర్వం ప్రదర్శించడం కాదు” చెప్పింది కొడీ. మౌనంగా ఉండటమే తెలివైన పని అనుకున్నాడు చిప్పీ.

బెల్లా ఎలుగుబంటి పొలంలో లేత గోధుమ మొక్కలు తిన్నందుకు అతడు ఎన్నోసార్లు శిక్షకు గురయ్యాడు. బెల్లా ఒక రోజు పొలం ఒక చివర్లో దాక్కుంది. అతడు వచ్చి తినడం మొదలు పెట్టగానే, ఆమె కర్రతో వచ్చి కొట్టింది.

దెబ్బలు తిన్న చిప్పీ అడవివైపు పరుగెత్తాడు.

సాయంత్రం బెల్లా కొడీని కలుసుకుని “చిప్పీని జాగ్రత్తగా ఉండమని చెప్పండి. ఎవరి వల్లనో అతని జీవితం ప్రమాదంలో పడకూడదు" అని చెప్పింది.

“అలా ఎందుకు అంటున్నావు బెల్లా?”.

“ఏమీ తెలియనట్లు నటించకు కొడీ. ఈ రోజు నేను అతన్ని కర్రతో బాదాను. అతని శరీరంపై నువ్వు తప్పకుండా గాయాలను చూసి ఉంటావు.

వాటిని చూసి నువ్వు ఎందుకు దెబ్బలు తిన్నావని అతన్ని అడగలేదా?”.