യുദ്ധമുഖം കീഴടക്കി ഡ്രോണാചാര്യർ

യുദ്ധതന്ത്രങ്ങളിൽ തരംഗം സൃഷ്ടിച്ച് ഡ്രോൺ സാങ്കേതിക വിദ്യ

- അജീഷ് മുരളീധരൻ

ആഗോള സംഘർഷങ്ങളിൽ പുതിയ പോർ മുഖം തുറക്കുകയാണ് യുദ്ധരംഗത്തുപയോഗിക്കുന്ന ഡ്രോണുകൾ. ഡ്രോൺ ആക്രമണങ്ങൾ മൂലമുണ്ടാകുന്ന നാശനഷ്ടങ്ങൾ കുറവായിരിക്കുമെങ്കിലും വലിയ സൈനിക ശക്തികളുടെ ആത്മവിശ്വാസം തകർക്കാനും ജനങ്ങൾക്കിടയിൽ പരിഭ്രാന്തി സൃഷ്ടിക്കാനും അവയ്ക്കാകും. വളരെ ചെറിയ ചെലവിൽ നിർമിക്കാമെന്നതും ഡ്രോണുകൾക്കുള്ള ആകർഷണീയതയാണ്. ഇസ്രയേലിനെതിരെ ഇറാനും ലബനൻ ആസ്ഥാനമായുള്ള ഭീകരസംഘടനയായ ഹിസ്ബുല്ലയും റഷ്യക്കെതിരെയും ഡോൺ ആക്രമണങ്ങൾ നടത്തുന്നുണ്ട്. യുക്രെയ്ൻ ഡ്രോണുകൾ റഷ്യൻ തലസ്ഥാനമായ മോസ്കോ വരെയെത്തിയ സംഭവവുമുണ്ടായി. കുറഞ്ഞ നിർമാണച്ചെലവുള്ള ഡ്രോണുകൾ ഉപയോഗിച്ച് വൻ തുക മുടക്കി നിർമിക്കുന്ന സങ്കീർണ സാങ്കേതിക വിദ്യകളുള്ള ടാങ്കുകളും വിമാനങ്ങളും യുദ്ധക്കപ്പലുകളുമൊക്കെ നശിപ്പിക്കാമെന്ന സാധ്യത ആഗോള യുദ്ധ സമവാക്യങ്ങൾ തന്നെ ഭാവിയിൽ മാറ്റിമറിച്ചേക്കും.