നിത്യഹരിത ഹരിത ഗാനങ്ങളുടെ ട്രാക്ക് തിരിച്ചുപിടിക്കാം.

സിനിമയിൽ കണ്ടന്റിന് മാത്രം പ്രാമുഖ്യമുള്ള കച്ചവടക്കാലത്ത് ഗാനങ്ങൾ ഒരു എസൻഷ്യൻ ഫാക്ടർ അല്ലാണ്ടായിരിക്കുന്നു എന്നതാണ് വസ്തുത

- അനീഷ് മോഹനചന്ദ്രൻ

ജീവിതം ആഘോഷമാക്കി മാറ്റുന്ന ഒരു ഗാനം വേണം. വരികളിലും ഈണത്തിലും അടി മുടി പോസിറ്റീവ് എനർജി സ്ഫുരിക്കണം. കേട്ടുനിൽക്കുന്ന വരെ അത് ത്രസിപ്പിക്കണം. ഇതായിരുന്നു സംവിധായകൻ പി. പത്മരാജന്റെ ഡിമാന്റ്. വരികൾ എഴുതാൻ അദ്ദേഹം ചുമതലപ്പെടുത്തിയത് കൈതപ്രം ദാമോദരൻ നമ്പൂതിരിയെ ആയിരുന്നു. ഈണം നൽകേണ്ട ചുമതല പെരുമ്പാവൂർ ജി. രവീന്ദ്രനാഥിനും 1990 മേയ് മാസം റിലീസ് ചെയ്ത ഇന്നലെ എന്ന തന്റെ ചിത്രത്തിന്റെ അണിയറപ്രവർത്തനങ്ങൾ പുരോഗമിക്കവേയാണ് പത്മരാജൻ ഇങ്ങനൊരു നിർദ്ദേശം നൽകിയത്. പിന്നെല്ലാം ഞൊടിയിടയിൽ സംഭവിക്കുകയായിരുന്നു.

നീ വിൺ പൂ പോൽ.. ഇതളായി തെളിയും.. വരമായി നിറമായി... ഞാൻ.. നിൻ പൂവിൻ ചിറകിൻ.. തണലിൽ... കുളിരായി ഒഴുകി.. എന്ന സൂപ്പർ ഹിറ്റ് ഗാനം പിറവിയെടുക്കുന്നത് പത്മരാജന്റെ ഈയൊരു താൽപര്യത്തിന്റെ ആഫ്റ്റർ എഫക്ട് ആയിട്ടായിരുന്നു. മലയാളത്തിലെ എക്കാലത്തേയും മികച്ച എവർഗ്രീൻ ഹിറ്റ് ഗാനങ്ങളിലൊന്നാണ് മേൽപ്പറഞ്ഞ നീ വിൺ പൂ പോൽ... എന്നത്. സംവിധായകന്റെ മനസ്സ് വായിച്ച കൈതപ്രത്തിന്റെ തൂലികയിൽ പിറന്ന അതിമനോഹര വരികൾക്ക് കൂടുതൽ ചാരുതയേ കാൻ പെരുമ്പാവൂർ ജി. രവീന്ദ്രനാഥിന്റെ താളബോധത്തിന് സാധിച്ചു. പരസ്പര പൂരകങ്ങളായ ചിന്തകളുടെ സംഗമഭൂവിലാകും ഇത്തരത്തിലൊരു മിക്ക സൂപ്പർ ഹിറ്റ് ഗാനങ്ങളും പിറവിയെടുത്തിട്ടുണ്ടാവുക എന്ന് പ്രത്യേകിച്ച് പറയേണ്ടതില്ലല്ലോ. നീ വിൺ പൂ പോൽ മാത്രമല്ല ഇന്നലെ എന്ന ചിത്രത്തിലെ എല്ലാ ഗാനങ്ങളും സൂപ്പർഹിറ്റുകൾ തന്നെ ആയിരുന്നു.