മാറുന്നുണ്ട് നമ്മൾ

കുടുംബ ബന്ധങ്ങളിൽ വലിയ മാറ്റങ്ങൾ വന്നതുകൊണ്ട് പുതുതലമുറയിൽ സ്നേഹമില്ലെന്നോ അവർ സന്തോഷിക്കുന്നില്ലെന്നോ മുൻവിധികൾ വേണ്ട. ബന്ധങ്ങളിലെ ആഴവും പരപ്പും അവർക്കിടയിൽ ഒട്ടും കുറവല്ല

- ഡോ.അദിതി എൻ. റിട്ട.അസോസിയേറ്റ്പ്രൊഫസർ മനഃശാസ്ത്രവിഭാഗം എം.ജി.കോളജ്, തിരുവനന്തപുരം

അഞ്ചുവർഷങ്ങൾക്കിപ്പുറം, പഴയ സുഹൃത്തുക്കളും സഹപ്രവർത്തകരും ശിഷ്യരുമായിരുന്ന മനഃശാസ്ത്രരംഗത്തെ ചികിത്സകരും സാമൂഹികപ്രവർത്തകരുമായി ഒരൊത്തു കൂടൽ നടത്തി. അറിയാനും വളരാനും ഉയരാനും മാത്രമല്ല, ഒപ്പമുള്ളവരെ എന്നും ഒപ്പം കൂട്ടാനുള്ള മാനുഷികമായ സ്നേഹ-സൗഹൃദ പരിഗണനകൾ ഇന്നും ഇത്തരം കൂട്ടായ്മയിലൂടെ ബാക്കിനിൽക്കുന്നു എന്നത് ആശ്വാസം.

യുവാക്കളുടെ അനുഭവ ജ്ഞാനത്തിൽ അധിഷ്ഠിതമായ ചില കണ്ടെത്തലുകൾ, ചില ഉൾക്കാഴ്ചകൾ, ആ ചർച്ചകളിൽ ഉരുത്തിരിഞ്ഞുവന്നു. സമൂഹം നാട്ടുകാർ എന്നിവയ് പണ്ടുണ്ടായിരുന്ന വിപുലവും വിശാലവും സമഗ്രവുമായ അർഥങ്ങളൊന്നും ഇന്നില്ല. വ്യക്തികൾക്ക് സമൂഹത്തെക്കാൾ പ്രാധാന്യം കൈവന്നിരിക്കുന്നു. അതെപ്പറ്റി ചിലത് പറയട്ടെ.

ഈ മാറ്റത്തിന്റെ പ്രതിഫലനങ്ങൾ ഏറ്റവുമധികം പ്രകടമാകുന്നത് വ്യക്തിജീവിതത്തിലും കുടുംബബന്ധങ്ങളിലുമാണ്. സമൂഹത്തിന്റെ ഘടനയ്ക്കും സംസ്കാരത്തിന്റെ നിലനിൽപിനുമായി വ്യക്തിജീവിതം പരുവപ്പെടുത്തുന്ന കുടുംബ ജീവിതം കാത്തുസൂക്ഷിക്കുന്ന രീതി മിക്കവാറും അസ്തമിച്ചു കഴിഞ്ഞുവെന്ന് പറയാം. വിദ്യാഭ്യാസം, വിവാഹം, ഉദ്യോഗം തുടങ്ങി എല്ലാ മേഖലകളിലും ഈ മാറ്റത്തിന്റെ പ്രഭാവം കാണാം. വീട്ടുകാരുടെ നിർബന്ധത്തിന് വഴങ്ങി ഇഷ്ടമല്ലാത്ത വിഷയം പഠിക്കുന്നതിനെക്കാൾ, ഇഷ്ടമുള്ളത് ചെയ്തു ജീവിക്കാൻ വേണ്ടത് പഠിക്കാൻ ഇന്നത്തെ തലമുറ തയ്യാറെടുത്ത് തുടങ്ങി. അതിനുള്ള പരിശീലനങ്ങൾ നൽകാൻ അച്ഛനമ്മമാരും ശീലിച്ചുകഴിഞ്ഞു. പാഷൻ പ്രൊഫഷനാക്കുക എന്ന ആശയം നടപ്പിലായിത്തുടങ്ങി. സർക്കാർ ഉദ്യോഗങ്ങളും അതിന് പറ്റിയ ബിരുദങ്ങളും ഏതാണ്ട് കാലഹരണപ്പെട്ടുകഴിഞ്ഞു.