വെരിക്കോസ് വെയിൻ ചികിത്സിക്കുമ്പോൾ

ജീവിതശൈലിയിലെ പ്രശ്നങ്ങൾ വെരിക്കോസ് വെയിൻ വർധിക്കാൻ ഇടയാക്കുന്നുണ്ട്. നേരത്തെ തിരിച്ചറിഞ്ഞ് കൃത്യമായ ചികിത്സ തേടുന്നത് രോഗത്തെ പ്രതിരോധിക്കാൻ സഹായിക്കും

- ഡോ.വിമൽഐപ്പ് സീനിയർകൺസൽട്ടന്റ് വാസ്കുലർ എൻഡോവാസ്കുലർ സർജറിവിഭാഗം ലൂർദ്ദ്സ്ഹോസ്പിറ്റൽ, കൊച്ചി

വെരിക്കോസ് വെയിൻ പ്രശ്നങ്ങളുമായി ആശുപത്രിയിലെത്തുന്ന ആളുകളുടെ എണ്ണം കൂടിക്കൊണ്ടിരിക്കുകയാണ്. ജീവിതശൈലിയിലെ പ്രശ്നങ്ങളാണ് കൂടുതലും കാരണമാകുന്നത്. രോഗബാ ധിതരിൽ ചിലർ ലക്ഷണങ്ങളെ അവഗണിച്ച് ചികിത്സ തേടാതിരിക്കുന്നതും രോഗം ഗുരുതരമാകാനിടയാക്കും. രോഗത്തെക്കുറിച്ചുള്ള അറിവില്ലായ്മയാണ് ഇതിന് കാരണം.

 എന്താണ് വെരിക്കോസ് വെയിൻ?

അശുദ്ധരക്തം ശരീരത്തി ന്റെ വിവിധ ഭാഗങ്ങളിൽനിന്ന് ഹൃദയത്തിലേക്ക് കൊണ്ടു പോകുന്ന രക്തക്കുഴലുകളാണ് സിരകൾ അഥവാ വെയിനുകൾ. ഞരമ്പ് എന്ന് ഇവയെ പൊതുവേ, തെറ്റായി വിളിക്കാറുണ്ട്. സിരകളിൽ നിന്നുള്ള രക്തം ശരീരത്തിന്റെ  താഴെനിന്ന് ഹൃദയത്തിലേക്ക് കയറുന്നത് ഗുരുത്വാകർഷണത്തിനെതിരേ പ്രവർത്തിച്ചാണ്. കാലിലെ പേശികൾ സങ്കോചിക്കുമ്പോൾ ഉണ്ടാവുന്ന മർദത്തിൽ രക്തം മുകളിലേക്ക് ഉയരുന്നതിനാലാണ് ഇത് സാധ്യമാകുന്നത്. രക്തക്കുഴലുകളുടെ ഭിത്തിയുടെ ഇലാസ്തികത ഇതിന് സഹായിക്കും. ഇത്തരത്തിൽ മുകളിലേക്ക് കയറുന്ന രക്തം വീണ്ടും താഴേക്ക് വരാതിരിക്കാൻ സഹായിക്കുന്നത് രക്തക്കുഴലുകളിലെ ചെറിയ വാൽവുകളാണ്.

എന്നാൽ, രക്തക്കുഴലുകളുടെ ഇലാസ്തികത നഷ്ടപ്പെടുകയും വാൽവുകൾക്ക് തകരാറുണ്ടാവുകയും ചെയ്യുന്ന അവസ്ഥയിൽ അശുദ്ധരക്തം കാലുകളിലും പാദങ്ങളിലും കെട്ടിനിൽക്കുകയും സിരകൾ തടിച്ചുവീർത്ത് കെട്ടുപിണഞ്ഞ് ചർമത്തിന് മുകളിൽ നീലനിറത്തിൽ കാണപ്പെടുകയും ചെയ്യുന്നു. ഈ അവസ്ഥയെയാണ് പൊതുവേ, വെരിക്കോസ്വെയിൻ എന്ന് പറയുന്നത്. രോഗാവസ്ഥ ഗുരുതരമായവരിൽ ഇവ പൊട്ടി രക്തസ്രാവമുണ്ടാകാനിടയുണ്ട്. ശരീരഭാരം മുഴുവൻ താങ്ങുന്നതുകൊണ്ടാണ് കൂടുതലായും കാലുകളിൽ ഇവ സങ്കീർണതകളുണ്ടാക്കുന്നത്. ഈ രോഗം രക്തക്കുഴലിനാണ്, രക്തത്തിനല്ല. അതിനാൽ, രക്തം വലിച്ചെടുത്തു കളഞ്ഞാൽ, ഈ രോഗം മാറില്ല.

കാരണങ്ങൾ

ചലനങ്ങൾ കുറയുന്നത് പേശികളുടെ സങ്കോചം കുറയാനും രക്തപ്രവാഹം കുറയാനും കാരണമാകുമെന്നതിനാൽ, പതിവായി ഏറെ നേരം നിൽക്കുകയും ഇരിക്കുകയും ചെയ്യുന്നവരിൽ രോഗസാധ്യത വർധിക്കാം.

അമിതവണ്ണമാണ് മറ്റൊരു കാരണം. ഭാരം കൂടുമ്പോൾ, സിരകളിൽ സമ്മർദം കൂടുന്നതാണ് കാരണം.വ്യായാമരഹിതമായ ജീവിതശൈലിയുള്ളവരിലും രക്തപ്രവാഹത്തിന്റെ തോത് കുറയും. ഇതും വെരിക്കോസ് വെയിനിനിടയാക്കും.