'ஸ்நேக்' தாஸ்!

தனியாக வசித்து வந்த பதின் வயது சிறுவன் அவன். உறவுகள் இருந்தாலும் அருகில் ஒருவரும் இல்லை. வளர்ப்பு நாய் மட்டுமே அவனுக்குத் துணை. ஒருநாள் வீட்டின் பின்புறம் ஓடும் வாய்க்காலில் குளித்துவிட்டு வந்து, உடையை எடுப்பதற்காக பீரோவை அவன் திறக்க, அதிலிருந்து தலை நீட்டுகிறது ஒரு பாம்பு. திறந்தது போலவே பீரோவைப் பூட்டி வைத்து விடுகிறான்

- டாக்டர் அகிலாண்ட பாரதி

நாய் விடாமல் பீரோவைச் சுற்றிச் சுற்றி வந்து குரைக்கிறது. நாய்க்குட்டியும் சிறியது தான். இரண்டு பேருக்கும் பாதுகாப்பு அவசியம். அக்கம் பக்கத்தினரிடம் உதவி கேட்கிறான் சிறுவன். "இன்னைக்கு செவ்வாய்க்கிழமை, நாங்க பாம்பை அடிக்க மாட்டோம்" என்று அனைவரும் பின் வாங்குகின்றனர்.

கிட்டத்தட்ட ஒரு மணி நேரம் பரபரப்புடன் தேடிய பின், மாற்று மதத்தவர் ஒருவர் வந்து உதவ சம்மதிக்கிறார். அவருடைய உதவியுடன் பாம்பு பிடிபடுகிறது. பாம்பை அடித்துக் கொன்று விடுகின்றனர்.

அதன் பின் ஆளாளுக்கு வந்து, 'செவ்வாய்க்கிழமை அதுவுமா பாம்பை கொன்னு இருக்கீங்க, ஏற்கனவே தனியா இருக்கே, அதனால் இந்தப் பரிகாரம் செய், 'அந்தப் பரிகாரம் செய்ய, என்று சிறுவனைக் குழப்புகின்றனர்.

பாம்பு தொடர்பான பல நம்பிக்கைகள் அன்று அவனைச் சென்று அடைகின்றன. அட பாம்புக்கு பின்னாடி இவ்வளவு விஷயமா என்று நினைக்கும் அவன் இறந்து கிடந்த பாம்பையே வெகு நேரம் பார்க்கிறான். அவர்கள் சொன்னது அனைத்தையும் மீறி இறந்த பாம்பை நினைத்துப் பரிதாபம் கொள்கிறான். அன்றிலிருந்து பாம்புகள் குறித்துத் தேடித் தேடிக் கற்றுக் கொள்கிறான்.