ഹോം സ്കൂളിങ് ലക്ഷങ്ങൾ മുടക്കാതെ കുട്ടികളെ പഠിപ്പിച്ചാലോ ?

വ്യത്യസ്തമായ പഠനരീതി

- സുമ സണ്ണി

മക്കൾക്ക് ഏറ്റവും മികച്ച വിദ്യാഭ്യാസം എന്നത് ഏതു സാധാരണക്കാരനെ സംബന്ധിച്ചും നടത്തിയെടുക്കേണ്ട സ്വപ്നമാണ്. എന്നാൽ, മികച്ച സ്കൂളുകൾ ലക്ഷങ്ങൾ ഫീസ് ഈടാക്കുന്നത് ഭൂരിപക്ഷത്തിനു മുന്നിലും പ്രതിബന്ധമാകുന്നു. ഈ സാഹചര്യത്തിൽ ഫീസ് ഇല്ലാതെതന്നെ കുട്ടികളെ നന്നായി പഠിപ്പിക്കുന്ന ഒരു രീതി പരിചയപ്പെട്ടാലോ? മാതാപിതാക്കളെയും പ്രകൃതിയെയും കണ്ടും അറിഞ്ഞും, ചുറ്റുപാടുകളിൽനിന്ന് ഊർജം ഉൾക്കൊണ്ട്, ഇഷ്ട വിഷയങ്ങൾ പഠിക്കുന്ന രീതിയാണു ഹോം സ്കൂളിങ്. ഓൺലൈൻ പഠന സൗകര്യങ്ങളും പാഠപുസ്തകങ്ങളും ലഭ്യമായ ഈ കാലഘട്ടത്തിൽ ഹോം സ്കൂളിങ് തിരഞ്ഞെടുക്കുന്നവരുടെ എണ്ണം ഇന്ത്യയിൽ കൂടിവരികയാണ്.

എന്തുകൊണ്ട് ഹോം സ്കൂളിങ്?

കോവിഡിനുശേഷം, ഓൺലൈൻ ക്ലാസുകൾ ആരംഭിച്ചതോടെ പല വീടുകളിലും മാതാപിതാക്കൾ, പ്രത്യേകിച്ച് അമ്മമാർ കുട്ടികളെ പഠിപ്പിക്കാൻ തുടങ്ങിയിരുന്നു. ആദ്യം ബുദ്ധിമുട്ടായിരുന്നെങ്കിലും പിന്നീട് അത് സൗകര്യപ്രദമായി തുടങ്ങി. ക്ലാസ് മുറികളിലെ പഠനംകൊണ്ടു മാത്രം മനസ്സിലാക്കാനാകത്തവരെ പഠിപ്പിക്കേണ്ടിവരും. അല്ലെങ്കിൽ ട്യൂഷനു വിടണം. സ്കൂളുകളുടെ കാര്യക്ഷമത ഇല്ലായ്മ കൊണ്ടാണിതെന്ന് മാതാപിതാക്കൾക്കു പരാതിയുണ്ട്. ഉയർന്ന ഫീസ് കൊടുത്ത ശേഷവും കുട്ടികളെ പഠിപ്പിക്കേണ്ട ഭാരം സ്വയം ഏറ്റെടുക്കേണ്ടി വരുന്നതും ഹോം സ്കൂളിങ് സ്വീകരിക്കാൻ ന്യൂ ജനറേഷൻ മാതാപിതാക്കളെ പ്രേരിപ്പിക്കുന്നു. ഓരോ കുട്ടിയും വ്യത്യസ്തനാണെങ്കിലും എല്ലാവരെയും ഒരുപോലെ പഠിപ്പിക്കുന്ന പതിനെട്ടാം നൂറ്റാണ്ടിൽ ഉരുത്തിരിഞ്ഞ പഠനരീതിയാണ് ഇപ്പോഴും നമ്മൾ പിന്തുടരുന്നത്. അതും വ്യത്യസ്തമായി ചിന്തിക്കുന്നവർ ഇതിലേക്ക് ആകർഷിക്കപ്പെടാൻ കാരണമാണ്. മാതാപിതാക്കളുടെ മേൽനോട്ടത്തിൽ കുട്ടികൾ വീട്ടിൽ ഇരുന്നു സ്കൂളിലെപ്പോലെ പഠിക്കുന്നതാണ് ഹോം സ്കൂളിങ്. സിലബസ് ഉള്ളതും ഇല്ലാത്തതുമായ സമ്പ്രദായങ്ങളുണ്ട്. ഇന്ത്യൻ നഗരങ്ങളിൽ, കോവിഡിനെത്തുടർന്നു വരുമാനം കുറഞ്ഞതും വർഷം നല്ലൊരു തുക ഫീസിനത്തിൽ കുറയ്ക്കാനാകുമെന്നതും പല മാതാപിതാക്കളെയും "ഹോം സ്കൂളിങ്ങി' ലേക്കു മാറാൻ പ്രേരിപ്പിച്ചു.