പ്ലാൻ കൊണ്ട് മാത്രം കാര്യമില്ല വേണം ശരിയായ ലക്ഷ്യങ്ങൾ

ലക്ഷ്യങ്ങൾ ശരിയാണെങ്കിൽ സാമ്പത്തികാസൂത്രണത്തിലൂടെ അവ നേടിയെടുക്കാനും ജീവിതത്തിലുടനീളം സന്തോഷം നിലനിർത്താനും സാധിക്കും.

നിങ്ങളുടെ ജീവിതലക്ഷ്യങ്ങൾ കൃത്യമായി പറഞ്ഞുകൊടുത്താൽ അതു നേടിയെടുക്കാൻ സഹായകമായ പദ്ധതി സർട്ടിഫൈഡ് ഫിനാൻഷ്യൽ പ്ലാനർമാർ തയാറാക്കിത്തരും. എന്നാൽ, അതിനു മുൻപ് ചെയ്യേണ്ട ഒരു കാര്യമുണ്ട്. നമ്മുടെ ലക്ഷ്യങ്ങൾ ശരിയായവ ആണെന്ന് നാം തന്നെ സ്വയം ഉറപ്പാക്കണം. ഇല്ലെങ്കിൽ എത്ര മികച്ച പ്ലാനിങ്ങളിലൂടെ ലക്ഷ്യങ്ങൾ കൈവരിച്ചാലും ജീവിതത്തിൽ സുഖമോ സന്തോഷമോ നേടാനാകില്ല എന്നതു മറക്കരുത്.

സമ്പാദ്യത്തിനു ലഭിച്ച ചോദ്യങ്ങൾക്കുള്ള ഉത്തരങ്ങളാണ് കവർ സ്റ്റോറിയിലെ ഓരോ ഫിനാൻഷ്യൽ പ്ലാനും. വിദഗ്ധർ ലക്ഷ്യങ്ങളി ലുള്ള പോരായ്മകളെക്കുറിച്ചു സൂചിപ്പിക്കുന്നുണ്ട ങ്കിലും ചോദ്യകർത്താവിന്റെ ലക്ഷ്യങ്ങൾ എങ്ങനെ പൂർത്തിയാക്കാം എന്നതിനു തന്നെയാണ് മുൻതൂക്കം നൽകിയിരിക്കുന്നത്. സ്വന്തം ലക്ഷ്യങ്ങൾ ശരിയായി നിശ്ചയിച്ചെങ്കിലേ ഏതു ഫിനാൻഷ്യൽ പ്ലാനും നിങ്ങൾക്ക് അനുയോജ്യമാകൂ, വിജയിച്ചു.

വിവാഹം ആർഭാടമാക്കാം, പക്ഷേ

മകളുടെ വിവാഹം നടത്താൻ എങ്ങനെ പരമാവധി പണം സമ്പാദിക്കാം? സമ്പാദ്യത്തിലേക്കു വന്ന ഈ വാട്സാപ് മെസേജ് നമ്മുടെ നാട്ടിലെ മിക്ക മാതാപിതാക്കളുടെയും മനസ്സിലുളളതു തന്നെയാണ്. പക്ഷേ, അതിൽ അമ്പരപ്പിക്കുന്ന ഒരു കാര്യം കൂടി ഉണ്ടായിരുന്നു. മകളുടെ പഠനം, സ്വന്തമായൊരു വീട് എന്നിവയെല്ലാം വിവാഹത്തിനുശേഷം മാത്രമേ പരിഗണിക്കുന്നുള്ളൂ എന്നതായിരുന്നു അത്.

ശരീരം നിറയെ പൊന്നും ഇട്ട്, വാഹനവും നൽകി ആർഭാടമായി വിവാഹം കഴിച്ചയച്ച പെൺമക്കളുടെ ദുരന്തം, തീരാ കണ്ണീരിൽ ആ കുടുംബങ്ങളുടെ തുടർകഥകളായി വാർത്തകളിൽ നിറഞ്ഞിട്ടും മാറി ചിന്തിക്കാൻ മാതാപിതാക്കൾക്കു കഴിയുന്നില്ല. സ്വന്തം കാലിൽ നിൽക്കാൻ ഓരോ പെൺകുട്ടിയും ആഗ്രഹിക്കുന്ന ഇക്കാലത്തും അവരെ പഠിപ്പിച്ചു വരുമാനം ഉറപ്പാക്കാനുള്ള സാഹചര്യം ഒരുക്കി കൊടുക്കുന്നതിലും മുൻതൂക്കം വിവാഹം ആർഭാടമാക്കുന്നതിലാണ്.

ആദ്യം മക്കളെ ജീവിക്കാൻ പ്രാപ്തരാക്കുക