રાજકાજ

ઝારખંડમાં ચંપાઈ સોરેનની સરકાર: અનિશ્ચિતતાનો અંત 

- ચાણક્ય

ઝારખંડમાં ચંપાઈ સોરેનની સરકારે વિધાનસભા ગૃહમાં બહુમતી પુરવાર કરી દીધી, એ સાથે જ રાજ્યમાં રાજકીય અનિશ્ચિતતાનો અંત આવ્યો છે. હેમંત સોરેનની ઇડી દ્વારા ધરપકડ પછી અડતાળીસ કલાક સુધી નવા વરાયેલા નેતા ચંપાઈ સોરેનને શપથિવિધિ માટે રાજ્યપાલ દ્વારા બોલાવાયા નહોતા, એ સમયગાળામાં અટકળો અને અનુમાનોનો દૌર ચાલ્યો હતો.એવા માહોલમાં ઝારખંડ મુક્તિ મોરચાના અને કોંગ્રેસના ધારાસભ્યોને હૈદરાબાદ લઈ જવાનું મુનાસિબ માનવામાં આવ્યું હતું. ધારાસભ્યોને અન્ય પક્ષમાં જતા અટકાવવા માટે આજકાલ આ સ્વાભાવિક બન્યું છે. ઝારખંડ અત્યારે તો પક્ષપલટાથી બચી ગયું છે, પરંતુ તેનાથી ભવિષ્ય સુનિશ્ચિત થઈ ગયું છે એમ માનીને ચાલી શકાય તેમ નથી. હેમંત સોરેનના પરિવારમાં જ મુખ્યપ્રધાનપદના દાવા માટે વિવાદ સર્જાયો હોવાના અહેવાલ હતા. એ જ રીતે કોંગ્રેસના કેટલાક ધારાસભ્યો પણ પક્ષ છોડવા માટે તત્પર હોવાની ચર્ચા હતી. ધારાસભ્યો ની ઇચ્છા વિના તેમનો પક્ષપલટો કોઈ કરાવી શકે નહીં. રાજકીય અનિશ્ચિતતાના માહોલમાં ચતુર ધારાસભ્યો આજકાલ નવા વિકલ્પો છે. સત્તાની લાલસા પક્ષ પ્રત્યેની નિષ્ઠાના તાંતણાને નબળા બનાવે છે.